വിദേശ രാജ്യങ്ങളിലേക്ക് സഞ്ചാരികളെ ആകർഷിക്കുന്ന ഒന്നാണ് ഹോട്ട് എയർ ബലൂണുകൾ. തുർക്കി, ടാൻസാനിയ, നമീബിയ, ന്യൂ മെക്സിക്കോ, ഈജിപ്ത് എന്നിവിടങ്ങളിലെ ഹോട്ട് എയർ ബലൂൺ റൈഡുകൾ പ്രസിദ്ധമാണ്. എന്നാൽ ആഗ്രഹമുണ്ടായിട്ടും നടക്കാതെ പോയ പല സഞ്ചാരികളും ഉണ്ടാകും. ഇനി ഹോട്ട് എയർ ബലൂൺ റൈഡിനായി ആരും കടൽ കടകടക്കേണ്ട. മറിച്ച് നമ്മുടെ ഇന്ത്യയിൽ തന്നെ നമുക്കത് നടത്താം.
രാജസ്ഥാനിലെ ജയ്പൂരിലും ജയ്സാൽമീറിലും ഹോട്ട് എയർ ബലൂൺ റൈഡ് ഉണ്ട്. കൂടാതെ ഗോവ, ഡൽഹി, ഹംപി എന്നിവിടങ്ങളും ഈ മനോഹരമായ വിനോദം സഞ്ചാരികളെ ആകർഷിക്കുന്നുണ്ട്.
ഹോട്ട് എയർ ബലൂൺ റൈഡുകൾ ആസ്വദിക്കാൻ കഴിയുന്ന ചില സ്ഥലങ്ങൾ നോക്കാം..
1. ജയ്പൂർ
രാജസ്ഥാനിലെ പ്രധാന വിനോദ സഞ്ചാര കേന്ദ്രമാണ് ജയ്പൂർ. നിരവധി ചരിത്ര പ്രധാന്യമുള്ള ഇവിടം രാജസ്ഥാന്റെ സംസ്കാരവും വിളിച്ചോതുന്നുണ്ട്. ജയ്പൂരിലെ ഹോട്ട് എയർ ബലൂൺ റൈഡുകൾക്ക് സഞ്ചാരികൾക്കിടയിൽ മികച്ച സ്വീകാര്യതയുണ്ട്.
2. ജയ്സാൽമീർ
രാജസ്ഥാനിലെ തന്നെ മറ്റൊരു വിനോദസഞ്ചാര കേന്ദ്രമാണ് ജയ്സാൽമീർ. സ്വർണനഗരി എന്നും ഇവിടം അറിയപ്പെടുന്നു. നിരവധി വിനോദ സഞ്ചാര കേന്ദ്രങ്ങളാണ് ഇവിടെയുള്ളത്. ഹോട്ട് എയർ ബലൂണും ഇവിടത്തെ പ്രത്യേകതയാണ്. ഈ റൈഡ് ജയ്സാൽമീർ ആകാശത്ത് നിന്നും രാജസ്ഥാന്റെ സൗന്ദര്യം പൂർണ്ണമായും ആസ്വദിക്കാം.
3. ഡൽഹി
സാഹസികത ഇഷ്ടപ്പെടുന്നവർക്ക് സന്ദർശിക്കാൻ പറ്റിയ സ്ഥലമാണ് ഡൽഹി. ചരിത്ര സ്മാരകങ്ങൾ മാത്രമല്ല ഡൽഹിയിലുള്ളത്. ഹോട്ട് എയർ ബലൂൺ റൈഡുകൾ നടത്താൻ ഇഷ്ടപ്പെടുന്നവരെ ആകർഷിക്കാനും ഇന്ന് ഡൽഹിക്ക് സാധിക്കും.
4. മണാലി
ഹണിമൂൺ തലസ്ഥാനമായ മണാലി പിർ പഞ്ചൽ, ധൗലാധർ കൊടുമുടികൾക്കിടയിലാണ് സ്ഥിതി ചെയ്യുന്നത്. മണാലിയിലെ പ്രധാന കായിക വിനോദമാണ് ഹോട്ട് എയർ ബലൂൺ റൈഡുകൾ. പച്ചപ്പ് നിറഞ്ഞ താഴ്വരാങ്ങളും മറ്റും ആസ്വദിച്ചുകൊണ്ട് മറക്കാനാവാത്ത ഒരു യാത്ര നടത്താനാവും.
5. ഗോവ
ഹോട്ട് എയർ ബലൂൺ റൈഡുകൾ ഗോവയിൽ വളരെ ജനപ്രിയമാണ്. അറബിക്കടലിന് മുകളിലൂടെ പറക്കുന്നത് ഏവരെയും ആശ്ചര്യപ്പെടുത്തുന്ന കാര്യമാണ്. ഗോവയിൽ എത്തുന്ന വിനോദസഞ്ചാരികളിൽ ഭൂരിഭാഗവും ഹോട്ട് എയർ ബലൂൺ റൈഡുകൾ തിരഞ്ഞെടുക്കാറുണ്ട്.
6. ഋഷികേശ്
വളരെ പ്രസിദ്ധമായ ഇടമാണ് ഋഷികേശ്. ആത്മീയത ഇഷ്ടപ്പെടുന്നവരും യാത്രകൾ നടത്തുന്നവരും സാഹസികതയെ സ്നേഹിക്കുന്നവരും ഇവിടം സന്ദർശിക്കാറുണ്ട്. ഋഷികേശിലും ഹോട്ട് എയർ ബലൂൺ റൈഡുകൾ നടത്താൻ സാധിക്കും. ആകാശത്തിന് മുകളിൽ നിന്ന് ഹിമാലയത്തിന്റെ താഴ്വരകൾ ചുറ്റുന്നത് ഒരു പുതിയ അനുഭവമായിരിക്കും നൽകുക.
7.ആഗ്ര
ചരിത്ര പ്രസിദ്ധമായ സ്മാരകങ്ങളാൽ സമ്പന്നമാണ് ആഗ്ര. ദിനം പ്രതി നിരവധി സഞ്ചാരികളാണ് ഇവിടെ എത്തുന്നത്. ആകാശത്ത് നിന്ന് താജ്മഹലിന്റെ ഭംഗി ആസ്വദിക്കാൻ നിങ്ങൾ ആഗ്രഹിക്കുന്നുണ്ടെങ്കിൽ ആഗ്രയിലെ ഹോട്ട് എയർ ബലൂൺ റൈഡുകൾ പരീക്ഷിക്കാം.
