ന്യൂഡൽഹി: ഈ വർഷത്തെ റിപ്പബ്ലിക് ദിന പരേഡിൽ വ്യോമസേനയിലെ വനിതാ അഗ്നിവീറുകളും പങ്കെടുക്കുമെന്ന് വ്യോമസേന എക്സിലൂടെ അറിയിച്ചു. 2024 റിപ്പബ്ലിക് ദിനത്തിന്റെ ഭാഗമാകാൻ കഴിഞ്ഞതിൽ അഭിമാനിക്കുന്നതായി സേനയുടെ എക്സ് സന്ദേശത്തിൽ പറയുന്നു.
ഈ വർഷത്തെ റിപ്പബ്ലിക് ദിന പരേഡിൽ പ്രതിരോധസേനയിലെ രണ്ട് വനിതാ സംഘങ്ങൾ പങ്കെടുക്കുന്നുണ്ട്. 144 പേർ അടങ്ങുന്ന ഒരു സംഘത്തിൽ അറുപത് പേർ കരസേനയിൽ നിന്നും ബാക്കിയുള്ളവർ വ്യോമസേനയിൽ നിന്നും നാവിക സേനയിൽ നിന്നുമുള്ളവരായിരിക്കും. ആംഡ് ഫോഴ്സ് മെഡിക്കൽ സർവീസസ് ഡയറക്ടറേറ്റ് ജനറലിൽ നിന്നുള്ള രണ്ടാമത്തെ സംഘത്തിൽ വനിതാ ഡോക്ടർമാരുടെ നേതൃത്വത്തിലുള്ള സൈനിക നഴ്സുമാർ ഉൾപ്പെടും.
പ്രതിരോധ സേനയിൽ സ്ത്രീ സാന്നിധ്യം വർദ്ധിപ്പിക്കാൻ പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള കേന്ദ്ര സർക്കാർ അതീവ ശ്രദ്ധയാണ് നൽകുന്നത്. ഇതിന്റെ ഭാഗമായാണ് വനിതാ സംഘങ്ങളെ റിപ്പബ്ലിക് ദിന പരേഡിൽ ഉൾപ്പെടുത്തിയതെന്ന് പ്രതിരോധ വകുപ്പ് ഉദ്യോഗസ്ഥർ പറഞ്ഞു.
Proud to don the Blues.
Proud to march together.
Proud to be a part of #RepublicDay 2024.#AgniveerVayu#AgniFemPower pic.twitter.com/1tuJyAEMR1
— Indian Air Force (@IAF_MCC) January 8, 2024
2022 സെപ്റ്റംബറിലാണ് അഗ്നിപഥ് നടപ്പിലാക്കിയത്. 17.5 വയസ്സ് മുതൽ 21 വയസ്സുവരെ പ്രായമുള്ളവർക്ക് ഹ്രസ്വകാല സൈനിക സേവനത്തിന് അവസരം നൽകുന്ന പദ്ധതിയാണ് അഗ്നിപഥ്. അഗ്നിപഥ് പദ്ധതി പ്രകാരം നിയമിതരാകുന്ന സേനാംഗങ്ങളെ അഗ്നിവീർ എന്നാണ് വിളിക്കുക.
