ഹൈദരാബാദ് : വയറുവേദനയുമായെത്തിയ തടവുകാരന്റെ വയറ്റിനുള്ളിൽ നിന്ന് ഡോക്ടർമാർ കണ്ടെത്തിയത് കഞ്ചാവ് പായ്ക്കറ്റുകളും , ഷേവിംഗ് ബ്ലേഡും , ആണിയും . ഹൈദരാബാദ് ചഞ്ചൽഗുഡ ജയിലിലെ 21 വയസ്സുള്ള മുഹമ്മദ് സുഹൈൽ എന്ന തടവുകാരന്റെ വയറ്റിനുള്ളിൽ നിന്നാണ് ഇത്രയേറെ സാധനങ്ങൾ കണ്ടെത്തിയത് .
അടുത്തിടെ മുഹമ്മദ് സുഹൈലിന് കടുത്ത വയറുവേദന അനുഭവപ്പെട്ടിരുന്നു. തുടർന്ന് ജയിൽ ഡോക്ടർമാരുടെ അടുത്തേക്ക് പരിശോധനയ്ക്കായെത്തി . ജയിലിലെ ഡോക്ടർമാർ പ്രാഥമിക ചികിത്സ നൽകിയെങ്കിലും പ്രയോജനമുണ്ടായില്ല. വയറുവേദന കൂടിക്കൊണ്ടിരിക്കുകയായിരുന്നു . തുടർന്ന് പോലീസ് സുഹൈലിനെ ഉസ്മാനിയ ആശുപത്രിയിലേക്ക് കൊണ്ടുപോയി. വിശദ പരിശോധനയും , സ്കാനിംഗും നടത്തിയ ഡോക്ടർമാർ സുഹൈലിന്റെ വയറിനുള്ളിലെ സാധനങ്ങൾ കണ്ട് അമ്പരന്നു.
ഷേവിംഗ് ബ്ലേഡും ആണികളും,രണ്ട് ചെറിയ റബ്ബർ ബോളുകളും പ്ലാസ്റ്റിക് പാക്കറ്റുകളും മറ്റ് ചെറിയ വസ്തുക്കളും പരിശോധനയിൽ കണ്ടെത്തി. വയറ്റിൽ നിന്ന് ഡോക്ടർമാരുടെ സംഘം എൻഡോസ്കോപ്പിയിലൂടെ ഇതെല്ലാം പുറത്തെടുത്തു. വയറ്റിൽ കണ്ടെത്തിയ പ്ലാസ്റ്റിക് പാക്കറ്റുകൾ കഞ്ചാവ് ഉണ്ടെന്ന സംശയത്തെ തുടർന്ന് ലാബിലേക്ക് അയച്ചു.തടവുകാരന്റെ ആരോഗ്യനില ഇപ്പോൾ തൃപ്തികരമാണ്
