ശ്രീനഗർ: ജമ്മു കശ്മീരിലെ പൂഞ്ച് ജില്ലയിലെ ദേര കി ഗലിക്ക് സമീപത്തെ വനമേഖലയിലുണ്ടായ തീപിടിത്തം നിയന്ത്രണ വിധേയമാക്കി സൈന്യം. പ്രദേശത്തെ സിവിൽ, ആർമി കെട്ടിടങ്ങൾക്ക് സമീപത്തായാണ് കാട്ടുതീ പടർന്നു പിടിച്ചത്. ഞായറാഴ്ച അതിരാവിലെ ആയിരുന്നു തീ പിടിത്തം ഉണ്ടായത്. സൈന്യത്തിന്റെ സമയോചിത ഇടപെടലിലൂടെ വൻ ദുരന്തം ഒഴിവാകുകയായിരുന്നു. സൈന്യത്തിന്റെ അതിവേഗ രക്ഷാപ്രവർത്തനം നിരവധി ജീവനുകൾ രക്ഷിച്ചതായും ഡിഫൻസ് പിആർഒ സമൂഹമാദ്ധ്യമത്തിൽ കുറിച്ചു. സുരക്ഷാ ഉദ്യോഗസ്ഥർ തീയണക്കാൻ ശ്രമിക്കുന്നതിന്റെ ദൃശ്യങ്ങളും അധികൃതർ കുറിപ്പിനൊപ്പം പങ്കുവച്ചിട്ടുണ്ട്.
