മലയാള സിനിമയിൽ വമ്പൻ തിരിച്ചുവരവ് നടത്തിയിരിക്കുകയാണ് ഓസ്ലർ എന്ന ചിത്രത്തിലൂടെ ജയറാം. ചിത്രം കേരളക്കരയിൽ മികച്ച അഭിപ്രായം നേടി മുന്നേറുകയാണ്. മെഡിക്കൽ ത്രില്ലർ ഗണത്തിൽപ്പെട്ട ചിത്രത്തിൽ മമ്മൂട്ടിയും ശ്രദ്ധേയമായ വേഷം കൈകാര്യം ചെയ്യന്നുണ്ട്. 11 നാണ് ചിത്രം തീയേറ്ററുകളിലെത്തിയത്. ചിത്രം വൻ വിജയമായതിന് പിന്നാലെ ജയറാം പറഞ്ഞ വാക്കുകളാണ് ഇപ്പോൾ ശ്രദ്ധേയമാകുന്നത്. ഇനി തന്റെ ആരാധകരെ നിരാശപ്പെടുത്തുന്ന ചിത്രങ്ങൾ ചെയ്യില്ലെന്ന് തുറന്ന് പറയുകയാണ് ജയറാം. ഒരു അഭിമുഖത്തിലാണ് താരം ഇക്കാര്യം അറിയിച്ചത്.
നൂറ് ശതമാനമല്ല, നൂറ്റിയൻപത് ശതമാനം ഉറപ്പ്. ഇനി എന്റെ ആരാധകരെ ഞാൻ നിരാശപ്പെടുത്തില്ല. ഇപ്പോൾ കിട്ടുന്ന സപ്പോർട്ട് ഒരിക്കലും കൈവിട്ടുകളയുകയില്ല എന്നായിരുന്നു ജയറാമിന്റെ മറുപടി.
ഒരു സിനിമക്ക് ആദ്യ ദിവസങ്ങളിൽ ഇനീഷ്യൽ കളക്ഷൻ ഭയങ്കരമായിട്ട് ഉണ്ടാകാം, അതിനു ശേഷം ആ സിനിമ എക്സ്ട്രാ ഷോകൾ വച്ച് മുന്നോട്ട് കൊണ്ടുപോകണമെങ്കിൽ കുടുംബ പ്രേക്ഷകർ തന്നെ എത്തണം. തീർച്ചയായും ഈ സിനിമയുടെ വിജയം കുടുംബ പ്രേക്ഷകരാണ്. ഇന്നലെ കേരളത്തിലെ തീയേറ്ററുകളിൽ ഞാൻ വിസിറ്റ് ചെയ്തപ്പോൾ എനിക്ക് കുടുംബ പ്രേക്ഷകരുടെ സ്നേഹം നേരിട്ട് അനുഭവിക്കാൻ സാധിച്ചു. അത് 35 വർഷം കൊണ്ട് ഞാൻ ഉണ്ടാക്കിയ സമ്പാദ്യമാണ്. അത് ഇനി ഞാൻ മിസ്സാക്കില്ല. ജയറാം പറഞ്ഞു.
