കോട്ടയം: മെഡിക്കൽ കോളേജിലെ രോഗിക്കും കൂട്ടിരിപ്പുകാർക്കുമായി സേവാഭാരതി നിർമിച്ച ശബരിഗിരീശ സേവാനിലയം സുപ്രീംകോടതി മുൻ ചീഫ് ജസ്റ്റീസ് കെ.ടി. തോമസ് ഉദ്ഘാടനം ചെയ്തു. ആതുര സേവനത്തിനിടയിൽ ജീവൻ നഷ്ടമായ ഡോ. വന്ദന ദാസിന്റെ സ്മരണയ്ക്കായി സേവ നിലയത്തിലെ ഒരു ബ്ലോക്കിന് വന്ദനദാസ് ബ്ലോക്ക് എന്ന് നാമകരണം ചെയ്തു.
മൂന്നരക്കോടി രൂപ ചെലവിലാണ് ഈ സേവാനിലയം പണിതത്. കോട്ടയം മെഡിക്കൽ കോളജ് കേന്ദ്രീകരിച്ചുള്ള സേവാഭാരതിയുടെ പ്രവർത്തനങ്ങൾ കാൽനൂറ്റാണ്ട് പിന്നിടുമ്പോഴാണ് പുതിയ ചുവടുവയ്പ്. ദൂരസ്ഥലങ്ങളിൽനിന്നുള്ള രോഗികൾക്കും കൂട്ടിരിപ്പുകാർക്കും ഇവിടെ സൗജന്യമായി താമസവും ഭക്ഷണവും സേവാഭാരതി ഒരുക്കും. മെഡിക്കൽ കോളജിനു സമീപം ഗാന്ധിനഗർ കെഎസ്ഇബി സബ്സ്റ്റേഷന് എതിർവശത്താണ് 12,000 ചതുരശ്ര അടിയിലുള്ള മൂന്നുനില കെട്ടിടം. 36 മുറിയുണ്ട് ഇവിടെ. രണ്ടു കിടക്കകളുള്ള 30 മുറി പൂർത്തിയായി. 300 പേർക്ക് ദിവസവും ഭക്ഷണം തയാറാക്കാൻ സൗകര്യവുമുണ്ട്.
സേവാഭാരതി യൂണിറ്റ് പ്രസിഡന്റ് കെ. രവീന്ദ്രൻ നായർ അദ്ധ്യക്ഷായ ചടങ്ങിൽ ദേശീയ സേവാഭാരതി സംസ്ഥാന വൈസ് പ്രസിഡന്റ് ഡോ. ഇ.പി. കൃഷ്ണൻ നമ്പൂതിരി ആമുഖ പ്രഭാഷണം നടത്തി. വാഴൂർ തീർത്ഥപാദാശ്രമം മഠാധിപതി പ്രജ്ഞാനാനന്ദ തീർത്ഥപാദർ അനുഗ്രഹപ്രഭാഷണം നടത്തി. ആദരിക്കൽ ചടങ്ങ് ദേശീയ സേവാഭാരതി സംസ്ഥാന പ്രസിഡന്റ് ഡോ. രഞ്ജിത്ത് വിജയഹരി ഉദ്ഘാടനം ചെയ്തു. ആർഎസ്എസ് ക്ഷേത്രീയ സംഘചാലക് ഡോ. ആർ. വന്യരാജൻ സേവാസന്ദേശം നല്കി.