അർജന്റീനയുടെ പരിശീലകനായി ലയണൽ സ്കലോണി കോപ്പ അമേരിക്ക വരെ തുടരും. അർജന്റെയ്ൻ മാദ്ധ്യമങ്ങളാണ് ഇക്കാര്യം റിപ്പോർട്ട് ചെയ്തത്. അർജന്റെയ്ൻ ഫുട്ബോൾ അസോസിയേഷൻ പ്രസിഡന്റ് ക്ലൗഡിയോ ടാപിയ സ്കലോണിയുമായി നടത്തിയ ചർച്ചയ്ക്ക് ഒടുവിലാണ് ഇക്കാര്യത്തിൽ ധാരണയായത്. ഇക്കാര്യം വരും ദിവസങ്ങളിൽ ഔദ്യോഗികമായി സ്ഥിരീകരിക്കും.
ജൂൺ 20 മുതൽ ജൂലൈ 14 വരെയാണ് കോപ്പ അമേരിക്ക ടൂർണമെന്റ് നടക്കുക. അർജന്റീനയുടെ പരിശീലക സ്ഥാനത്ത് നിന്ന് ഒഴിയുമെന്ന് സ്കലോണി നേരത്തെ സൂചന നൽകിയിരുന്നു. ‘ലയണൽ സ്കലോണി അർജന്റീന ദേശീയ ടീമിന്റെ പരിശീലകനായി തുടരും. കോപ്പ അമേരിക്കയിൽ ടീമിനെ പരിശീലിപ്പിക്കും. അർജന്റീനയിലെ ടൈക്സ്പോർട്സിന്റെ സ്പോർട്സ് ജേണലിസ്റ്റ് ഗാസ്റ്റൺ എഡൽ എക്സിൽ കുറിച്ചു.
45 കാരനായ സ്കലോണി 2018ലാണ് അർജന്റീനയുടെ പരിശീലകനായി ചുമതലയേറ്റെടുത്തത്. അർജന്റീനയ്ക്ക് കോപ്പ അമേരിക്ക, ഫൈനലിസിമ, ഫിഫ ലോകകപ്പ് തുടങ്ങിയ കിരീടങ്ങൾ നേടിക്കൊടുക്കാൻ അദ്ദേഹത്തിനായി.
