ആരാധകർ പ്രതീക്ഷയോടെ കാത്തിരിക്കുന്ന തമിഴ് ചിത്രങ്ങളിലൊന്നാണ് സൂര്യ നായകനായെത്തുന്ന കങ്കുവ. ചിത്രത്തിന്റെ സെക്കൻഡ് ലുക്ക് ഇന്ന് പുറത്തുവന്നിരുന്നു. സൂര്യ തന്നെയാണ് സമൂഹമാദ്ധ്യമങ്ങളിലൂടെ സെക്കൻഡ് ലുക്ക് പങ്കുവച്ചത്. സിരുത്തെ ശിവയുടെ സംവിധാനത്തിലൊരുങ്ങുന്ന ചിത്രം ആരാധകർ ആകാംക്ഷയോടെയാണ് കാത്തിരിക്കുന്നത്.
രണ്ട് ചിത്രങ്ങളാണ് സെക്കൻഡ് ലുക്കിലുള്ളത്. രണ്ട് കാലഘട്ടത്തെയാണ് സെക്കൻഡ് ലുക്ക് സൂചിപ്പിക്കുന്നത്. പ്രേക്ഷകരുടെ ആകാംക്ഷ ഇരട്ടിയാക്കുന്നതാണ് ചിത്രത്തിന്റെ പുതിയ അപ്ഡേഷൻ. പൊങ്കലിനോടനുബന്ധിച്ചാണ് കങ്കുവയുടെ സെക്കൻഡ് ലുക്ക് പുറത്തുവിട്ടിരിക്കുന്നത്. വിവിധ കാലഘട്ടത്തിലെ കഥയാണ് ചിത്രം പറയുന്നത്.
ഈ വർഷം പകുതിയോടെ തന്നെ കങ്കുവ തിയേറ്ററിലെത്തുമെന്ന് ചിത്രത്തിന്റെ അണിയറ പ്രവർത്തകർ അറിയിച്ചിരുന്നു. ഒരു പാൻ ഇന്ത്യൻ സിനിമയാണ് കങ്കുവ. അടുത്തിടെ സിനിമയുടെ ചിത്രീകരണം പൂർത്തിയായ വിവരം സൂര്യ പങ്കുവച്ചിരുന്നു. സൂര്യയുടെ കരിയറിലെ ഏറ്റവും വലിയ സിനിമകളിൽ ഒന്നായിരിക്കും കങ്കുവ.
