ആരാധകർ ആവേശത്തോടെ കാത്തിരിക്കുന്ന ചിത്രമാണ് താരരാജാവ് മോഹൻലാൽ നായകനാകുന്ന മലൈക്കോട്ടൈ വാലിബൻ. ചിത്രത്തിന്റെതായി എത്തുന്ന ഓരോ അപ്ഡേറ്റും ആരാധകരെ ആകാംക്ഷയുടെ കൊടുമുടിയിലാണ് എത്തിക്കുന്നത്. ചിത്രം 25 ന് റിലീസാകാനിരിക്കെ പുതിയ അപ്ഡേറ്റ് പുറത്തു വന്നിരിക്കുകയാണ്. ചിത്രത്തിന്റെ ഓഡിയോ ലോഞ്ച് നാളെ നടക്കുമെന്നാണ് വിവരം.
കൊച്ചിയിലാകും ഓഡിയോ ലോഞ്ച് ചടങ്ങ് നടക്കുന്നത്. മോഹൻലാൽ അടക്കമുള്ള എല്ലാ അഭിനേതാക്കളും ഓഡിയോ ലോഞ്ചിൽ പങ്കെടുക്കുമെന്നാണ് വിവരം. അതോടൊപ്പം മലൈക്കോട്ടൈ വാലിബന് രണ്ട് ഭാഗങ്ങൾ ഉണ്ടാകുമെന്നും വാർത്തകൾ പുറത്ത് വരുന്നുണ്ട്. അങ്ങനെയാണെങ്കിൽ ചിത്രം പ്രേക്ഷകർ പ്രതീക്ഷകൾക്ക് അപ്പുറമാകുമെന്ന് ഉറപ്പിക്കാം. സിനിമാ എക്സ്പ്രസാണ് രണ്ടാം ഭാഗത്തെ കുറിച്ച് റിപ്പോർട്ട് ചെയ്തിരിക്കുന്നത്.
ലിജോ ജോസ് പെല്ലിശ്ശേരിയുടെ ചിത്രത്തിൽ ആദ്യമായി മോഹൻലാൽ നായകനാകുന്നു എന്നതിനാൽ പ്രേക്ഷക പ്രതീക്ഷകൾ ഏറെയാണ്. രണ്ടു മണിക്കൂർ ഏഴ് മിനിറ്റുമാണ് മലൈക്കോട്ടൈ വാലിബന്റെ ദൈർഘ്യം. ചിത്രത്തിന്റെ പോസ്റ്ററുകളും ടീസറും, ഗാനത്തിനുമെല്ലാം ആരാധകർക്കിടയിൽ മികച്ച സ്വീകാര്യതയാണ് ലഭിച്ചിട്ടുള്ളത്.
സൊണാലി കുൽക്കർണി, ഹരീഷ് പേരടി, ഡാനിഷ് സെയ്ത്, മനോജ് മോസസ്, കഥ നന്ദി, മണികണ്ഠൻ ആചാരി തുടങ്ങി നിരവധി താരങ്ങൾ ചിത്രത്തിൽ പ്രധാന വേഷങ്ങളിലെത്തുന്നു. ജോൺ ആൻഡ് മേരി ക്രിയേറ്റിവിസ്, സെഞ്ച്വറി ഫിലിംസ്, അനൂപിന്റെ മാക്സ് ലാബ്, വിക്രം മെഹ്റ, സിദ്ധാർഥ് ആനന്ദ് കുമാർ എന്നിവരുടെ ഉടമസ്ഥയിലുള്ള സരിഗമ ഇന്ത്യാ ലിമിറ്റഡ് എന്നിവർ ചേർന്നാണ് ചിത്രത്തിന്റെ നിർമ്മാണം. പി.എസ് റഫീക്കിന്റേതാണ് തിരക്കഥ.