മലയാള സിനിമാ രംഗത്തും ഇപ്പോൾ സീരീസുകളുടെ കാലമാണ്. മറ്റു ഭാഷകളിൽ നേരത്തെ സീരീസുകൾ സജീവമായി ഉണ്ടായിരുന്നെങ്കിലും മലയാളത്തിൽ ആദ്യത്തെ വെബ് സീരീസ് എത്തുന്നത് 2023 ലാണ്. അജു വർഗീസ് നായകനായെത്തിയ കേരളാ ക്രൈം ഫയൽസായിരുന്നു മലയാളത്തിലെ ആദ്യ വെബ് സീരീസ്. ഇപ്പോഴിതാ മലയാളത്തിലെ നാലാമത്തെ വെബ് സീരീസായി ‘പോച്ചർ’ എത്തുകയാണ്. നിമിഷ സജയൻ, റോഷൻ മാത്യൂ എന്നിവരെ കേന്ദ്ര കഥാപാത്രങ്ങളാക്കി റിച്ചി മേത്തയാണ് പോച്ചർ സംവിധാനം ചെയ്യുന്നത്. ആമസോൺ പ്രൈം വീഡിയോയിലൂടെ ഫെബ്രുവരി 23 മുതൽ പോച്ചർ സ്ട്രീമിംഗ് ആരംഭിക്കും.
ഒരു സസ്പെൻസ് ത്രില്ലർ ഗണത്തിലാണ് പോച്ചർ ഒരുങ്ങുന്നത്. ഓസ്കർ ജേതാക്കളായ പ്രൊഡക്ഷൻ ഫിനാൻസ് കമ്പനിയായ ക്യുസി എന്റർടെയ്ൻമെന്റാണ് പോച്ചർ നിർമ്മിക്കുന്നത്. ഇവർ മലയാളത്തിൽ നിർമ്മിക്കുന്ന ആദ്യ വെബ് സീരീസ് എന്ന പ്രത്യേകതയും പോച്ചറിനുണ്ട്. സംവിധായകൻ റിച്ചി മേത്ത തന്നെയാണ് പോച്ചറിന്റെ കഥയും തിരക്കഥയും ഒരുക്കിയിരിക്കുന്നത്.
ചിത്രത്തിൽ പോലീസ് വേഷത്തിലാണ് നിമിഷ എത്തുന്നത്. വനം വകുപ്പ് ഉദ്യോഗസ്ഥർക്കൊപ്പം ആനക്കൊമ്പ് വേട്ട സംഘത്തെ പിടികൂടാനെത്തുന്ന ഉദ്യോഗസ്ഥയുടെയും ഒപ്പമുള്ളവരുടെയും കഥയാണ് ഈ സീരീസിൽ പറയുന്നത്. ദിബ്യേന്ദു ഭട്ടാചാര്യ എന്ന ബോളിവുഡ് താരവും പോച്ചറിൽ ശ്രദ്ധേയമായൊരു കഥാപാത്രത്തെ അവതരിപ്പിക്കുന്നുണ്ട്.
മലയാളം, ഹിന്ദി, ഇംഗ്ലീഷ് തുടങ്ങിയ ഭാഷകളിലായിരിക്കും പോച്ചർ സ്ട്രീമിംഗിനെത്തുന്നത്. 2023 ൽ സീരീസിന്റെ ചിത്രീകരണം പൂർത്തിയായിരുന്നു. എട്ട് എപ്പിസോഡുകളായാണ് സീരീസ് സ്ട്രീമിംഗ് ചെയ്യുക.
മലയാളത്തിൽ ഇതുവരെ എത്തിയ സീരീസുകളെല്ലാം പ്രേക്ഷകർ ഏറ്റെടുത്തിരുന്നു. കോമഡിക്ക് പ്രാധാന്യം നൽകി എത്തിയ പേരില്ലൂർ പ്രീമിയർ ലീഗാണ് മലയാളത്തിൽ അവസാനമായി പ്രദർശനത്തിനെത്തിയ സീരീസ്. സണ്ണി വെയ്നും നിഖില വിമലും കേന്ദ്ര കഥാപാത്രങ്ങളായ പേരില്ലൂർ പ്രീമിയർ ലീഗ് ഹോട്ട്സ്റ്റാറിൽ മികച്ച അഭിപ്രായം നേടി മുന്നേറുകയാണ്.