ചായ പ്രേമികളായിരിക്കും നമ്മിൽ ബഹുഭൂരിപക്ഷം ആളുകളും. കട്ടൻ ചായ, പാൽ ചായ, മസാല ചായ എന്നിങ്ങനെ നിരവധി ചായകൾ അടുക്കളപ്പുറങ്ങളിൽ തിളച്ചു മറിയുമ്പോൾ ടേസ്റ്റ് അറ്റ്ലസിന്റെ പട്ടികയിൽ ഇടംപിടിച്ചിരിക്കുകയാണ് ഇന്ത്യയുടെ സ്വന്തം മസാല ചായ. പ്രശസ്ത ട്രാവൽ ഗൈഡായ ടേസ്റ്റ് അറ്റ്ലസിന്റെ പട്ടികയിൽ രണ്ടാം സ്ഥാനത്താണ് മസാല ചായ ഇടംപിടിച്ചിരിക്കുന്നത്.
പാൽ ചായ, കട്ടൻ ചായ എന്നിവയിൽ നിന്നും വ്യത്യസ്ത രുചികൾ തേടുന്നവരുടെ മുന്നിലേക്കാണ് മസാല ചായ തിളച്ചുപൊങ്ങിയത്. ഭാരതത്തിലെ സുഗന്ധ വ്യഞ്ജനങ്ങളായ ഏലക്ക, കുരുമുളക്, ഗ്രാമ്പു, കറുവാപ്പട്ട, ഇഞ്ചി തുടങ്ങിയവയും തേയിലയും ചേർത്ത് തിളപ്പിച്ചെടുക്കുന്ന മസാല ചായയ്ക്ക് പ്രത്യേക രുചിയാണ്. ഇത് മറ്റു ചായകളിൽ നിന്നും വ്യത്യസ്തമായിരിക്കുന്നുവെന്നും ശരീരത്തിന് ആരോഗ്യം നൽകുന്നുവെന്നും ടേസ്റ്റ് അറ്റ്ലസ് പറയുന്നു. മസാല ചായയുടെ പ്രാധാന്യം സമൂഹ മാദ്ധ്യമങ്ങളിലൂടെ പങ്കുവച്ചതോടെ നിരവധി ഭക്ഷണ പ്രേമികളും ചായ പ്രേമികളുമാണ് ആഗോളതലത്തിൽ ഇന്ത്യയുടെ മസാല ചായയ്ക്ക് കിട്ടിയ അംഗീകാരത്തിൽ സന്തോഷം പങ്കുവച്ച് രംഗത്തെത്തിയത്.