ടി20യിൽ രോഹിത് ശർമ്മയ്ക്ക് മികച്ച ഓപ്പണിംഗ് പാർട്ണർ യശസ്വി ജയ്സ്വാളാണെന്ന് ആകാശ് ചോപ്ര. ടി20യിൽ കഴിഞ്ഞ വർഷം അരങ്ങേറിയതു മുതൽ യശസ്വി മികച്ച ഫോമിലാണുള്ളത്. ഗിൽ മികച്ച താരമാണെങ്കിലും ഏകദിന ക്രിക്കറ്റ് ലോകകപ്പിന് ശേഷം ഫോം കണ്ടെത്താൻ പാടുപെടുകയാണ്. അതുകൊണ്ട് തന്നെ വരാനിരിക്കുന്ന ടി20 ലോകകപ്പിൽ രോഹിത്തിനൊപ്പം ഓപ്പണിംഗിൽ ഇറങ്ങാൻ അനുയോജ്യൻ യശസ്വിയാണെന്നും ആകാശ് ചോപ്ര പറഞ്ഞു.
ടി20 ലോകകപ്പിന് മുന്നോടിയായി നടന്ന അവസാന ടി20 മത്സരമായിരുന്നു അഫ്ഗാനിസ്ഥാനെതിരെ നടന്നത്. രണ്ടാമത്തെ ടി20യിൽ യശസ്വി നേടിയ അതിവേഗ സെഞ്ച്വറിയാണ് ഇന്ത്യയുടെ വിജയത്തിൽ നിർണായകമായത്. ഇതുവരെയുള്ള ടൂർണമെന്റുകളിലെ യശസ്വിയുടെ പ്രകടനം വിലയിരുത്തുമ്പോൾ ടീമിലെ സ്ഥിരം സാന്നിദ്ധ്യമായി യശസ്വി മാറി. ചോപ്ര കൂട്ടിച്ചേർത്തു.
ടി20 ലോകകപ്പിന്റെ ഭാഗമാകാൻ പോകുന്ന കുറച്ച് താരങ്ങളെ പറ്റി കഴിഞ്ഞ ദിവസം നായകൻ രോഹിത് ശർമ്മ സൂചന നൽകിയിരുന്നു. വെസ്റ്റ് ഇൻഡീസിലും അമേരിക്കയിലുമായി നടക്കുന്ന ടൂർണമെന്റിൽ സാഹചര്യങ്ങൾ ഉൾപ്പെടെ പരിഗണിച്ചാകും ടീമിനെ തിരഞ്ഞെടുക്കുക. പക്ഷേ ടി20യുടെ ഭാഗമാകാൻ പോകുന്ന 10 കളിക്കാരെ കുറിച്ച് എനിക്കറിയാം. ടീമിന് എന്താണോ ആവശ്യം ആ രീതിയിലുള്ള ടീമിനെയായിരിക്കും തിരഞ്ഞെടുക്കുകയെന്നും രോഹിത് പറഞ്ഞു.
