അന്തരിച്ച നടനും ഡിഎംഡികെ നേതാവുമായ വിജയകാന്തിന് പത്മഭൂഷൺ. കലാരംഗത്തെ മികച്ച സേവനത്തിനാണ് പത്മഭൂഷൺ നൽകി വിജയകാന്തിനെ ആദരിച്ചത്. 75-ാം റിപ്പബ്ലിക് ദിനം ആഘോഷിക്കാനിരിക്കെ രാഷ്ട്രപതി രാജ്യത്തെ അഭിസംബോധന ചെയ്തിരുന്നു. ഇതിന് പിന്നാലെയാണ് പുരസ്കാരങ്ങൾ പ്രഖ്യാപിച്ചത്.
രണ്ട് തവണ തമിഴ്നാട് നിയമസഭാംഗമായിരുന്ന വിജയകാന്ത് വാർദ്ധക്യ സഹജമായ അസുഖങ്ങളെ തുടർന്ന് ചികിത്സയിലിരിക്കെ 2023 ഡിസംബർ 28-നാണ് അന്തരിച്ചത്. 2011 മുതൽ 2016 വരെ തമിഴ്നാട് നിയമസഭയിലെ പ്രതിപക്ഷ നേതാവായിരുന്നു അദ്ദേഹം.
തമിഴ്നാട്ടിൽ നിന്ന് കോയമ്പത്തൂരിലെ വള്ളി ഓയിൽ കുമ്മിയാട്ട നർത്തകി പാതിരപ്പന് (87) പത്മശ്രീ പുരസ്കാരം പ്രഖ്യാപിച്ചിട്ടുണ്ട്. തമിഴ്നാട്ടിൽ നിന്നുള്ള ഭരതനാട്യം കലാകാരി പത്മ സുബ്രഹ്മണ്യത്തിന് പത്മവിഭൂഷണും ലഭിച്ചു. തമിഴ്നാട് മുൻ ഗവർണർ ഫാത്തിമ ബീവിക്ക് പത്മഭൂഷൺ പ്രഖ്യാപിച്ചു.