സാഹസികവും വിനോദപരവുമായ കാഴ്ചകൾ പ്രേക്ഷകരിലേക്ക് എത്തിക്കുന്നതിൽ വളരെയധികം താത്പര്യം പ്രകടിപ്പിക്കുന്ന വ്യക്തിയാണ് ആനന്ദ് മഹീന്ദ്ര. യാത്രകൾ വളരെയധികം ഇഷ്ടപ്പെടുന്ന അദ്ദേഹം, പോകാൻ ഇഷ്ടപ്പെടുന്ന സ്ഥലങ്ങളുടെ ബക്കറ്റ് ലിസ്റ്റുകളും മുമ്പ് സമൂഹമാദ്ധ്യമ ഉപയോക്താക്കളുമായി പങ്കുവച്ചിരുന്നു. എന്നാൽ ഇപ്പോൾ അദ്ദേഹം പോകാൻ ആഗ്രഹിക്കാത്തതും പരീക്ഷിക്കാൻ താത്പര്യമില്ലാത്തതുമായ ഒരു സാഹസികതയാണ് സമൂഹമാദ്ധ്യമ ഉപയോക്താക്കളുമായി പങ്കുവച്ചിരിക്കുന്നത്.
ഒരു കൂട്ടം സാഹസികർ എയർ ട്രാംപോളിൻ പരീക്ഷിക്കുന്നതിന്റെ വീഡിയോയാണിത്. ‘ ഇതെന്റെ ബക്കറ്റ് ലിസ്റ്റിൽ ഉൾപ്പെടുന്നതല്ല, എന്നാൽ എന്തൊരു മനോഹരമായ വീഡിയോയാണിത്’ എന്ന അടിക്കുറിപ്പോടെയാണ് ആനന്ദ് മഹീന്ദ്ര വീഡിയോ പങ്കുവച്ചത്. സാഹസികത ഇഷ്ടപ്പെടുന്നവർക്ക് കൗതുകമുണർത്തുന്ന അഭ്യാസങ്ങളാണ് വീഡിയോയിലുള്ളത്.
Attempting this is NOT on my bucket list.
But what a perfect video to watch from an armchair to create the right mood on a Sunday morning ….🙂 pic.twitter.com/7ab9516Ee5
— anand mahindra (@anandmahindra) January 28, 2024
പഞ്ഞിക്കെട്ട് വിരിച്ച പരവതാനി പോലെ ആകാശം. അതിലൂടെ അലാവുദ്ദീന്റെ അത്ഭുത വിളക്കിലെ പരവതാനി പോലുള്ള സംഭവത്തിൽ ഒരു കൂട്ടം ആളുകൾ യാത്ര നടത്തിയാൽ എങ്ങനെയിരിക്കും? അത്തരത്തിൽ ഹോട്ട് എയർ ബലൂൺ ഉപയോഗിച്ച് എയർ ട്രാംപോളിൻ പരീക്ഷിക്കുകയാണ് സാഹസികർ. ഹോട്ട് എയർ ബലൂണിൽ ഘടിപ്പിച്ച പാഡിൽ നിന്നും ചാടിയും ഇരുന്നുമൊക്കെ മേഘങ്ങളിലൂടെ അതിവേഗം അവർ സഞ്ചരിക്കുന്ന കാഴ്ചയാണ് വീഡിയോയിലുള്ളത്. പാഡിൽ നിന്നും ഇവർ താഴോട്ട് കുതിക്കുന്നതും നമുക്ക് കാണാൻ സാധിക്കും. സാഹസികർക്ക് തിരഞ്ഞെടുക്കാവുന്ന ഉത്തമ വിനോദമാണിത്. എന്നാൽ അതീവ സുരക്ഷ സംവിധാനങ്ങൾ ഉപയോഗിച്ചു മാത്രമേ ഇത്തരം കാര്യങ്ങൾ പരീക്ഷിക്കാൻ പാടുകയുള്ളൂവെന്നും ആനന്ദ് മഹീന്ദ്ര സമൂഹമാദ്ധ്യമ ഉപയോക്താക്കൾക്ക് നിർദ്ദേശം നൽകുന്നുണ്ട്.
