ന്യൂഡൽഹി: ഇംഗ്ലണ്ടിനെതിരായ ടെസ്റ്റ് പരമ്പരയിലെ അവസാന മൂന്ന് മത്സരങ്ങൾക്കുള്ള ടീമിനെ ഇന്ന് പ്രഖ്യാപിച്ചേക്കും. വ്യക്തിപരമായ കാരണങ്ങളെ തുടർന്ന് ആദ്യ ടെസ്റ്റ് മത്സരങ്ങൾക്ക് ഇല്ലാതിരുന്ന വിരാട് കോലി ടീമിലേക്ക് മടങ്ങിയെത്തുമോയെന്നാണ് ആരാധകർ കാത്തിരിക്കുന്നത്. പരിക്കിനെ തുടർന്ന് രണ്ടാം ടെസ്റ്റിനുള്ള ടീമിൽ നിന്ന് രവീന്ദ്ര ജഡേജയും കെഎൽ രാഹുലും പുറത്തായിരുന്നു. ഈ സാഹചര്യത്തിൽ ടീം പ്രഖ്യാപിക്കുമ്പോൾ ഇന്ത്യൻ ടീമിൽ കൂടുതൽ മാറ്റങ്ങളുണ്ടായേക്കും.
പരിക്കേറ്റ കെ.എൽ രാഹുലും രവീന്ദ്ര ജഡേജയും ബിസിസിഐയുടെ മെഡിക്കൽ സംഘത്തിന്റെ നിരീക്ഷണത്തിലാണ്. ഇരുവർക്കും പകരമായി രണ്ടാം ടെസ്റ്റിനുള്ള ടീമിൽ സൗരഭ് കുമാർ, വാഷിംഗ്ടൺ സുന്ദർ, സർഫറാസ് ഖാൻ എന്നിവരെ ടീമിൽ ഉൾപ്പെടുത്തിയിരുന്നു. രവിചന്ദ്ര അശ്വിനും ജഡേജയും അക്‌സറുമുള്ള ടീമിൽ കുൽദീപ് യാദവിന് അവസരം ലഭിച്ചിരുന്നില്ല. ജഡേജയെ പോലെ സ്പിൻ ഓൾ റൗണ്ടറായ സൗരഭ് കുമാറിനെ അടുത്ത ടെസ്റ്റിൽ പരിഗണിച്ചാൽ കുൽദീപ് പുറത്തിരിക്കേണ്ടി വരും.
രണ്ടാം ടെസ്റ്റിലൂടെ രജത് പട്ടീദാർ, സർഫറാസ് ഖാൻ, ധ്രുവ് ജുറേൽ, സൗരഭ് കുമാർ എന്നിവർ അരങ്ങേറ്റത്തിന് കാത്തിരിക്കുകയാണ്. എന്നാൽ ഇവരിലാരെല്ലാം മൂന്നാം ടെസ്റ്റ് മുതൽ ഉണ്ടാകുമെന്ന് വ്യക്തമല്ല.
