കോഴിക്കോട്: കോഴിക്കോട് എൻഐടി അദ്ധ്യാപിക ഷൈജ ആണ്ടവനെതിരെ എബിവിപി പ്രതിഷേധം. അദ്ധ്യാപികയ്‌ക്കെതിരെ നടപടിയെടുക്കണമെന്ന് ആവശ്യപ്പെട്ട് എബിവിപി ക്യാമ്പസിലേക്ക് മാർച്ച് നടത്തി. കോഴിക്കോട് ജില്ലാ കമ്മിറ്റിയാണ് പ്രതിഷേധം നടത്തിയത്. ഗാന്ധിയെ കൊന്ന ഗോഡ്സെയെ തള്ളിപ്പറയുന്ന നിലപാടാണ് എബിവിപി എക്കാലത്തും സ്വീകരിച്ചിട്ടുള്ളതെന്നും വിഷയത്തിൽ യുജിസിക്ക് പരാതി നൽകുമെന്നും നേതാക്കൾ വ്യക്തമാക്കി.
വിവാദത്തിൽ അദ്ധ്യാപികയിൽ നിന്ന് വിശദീകരണം തേടാൻ രജിസ്ട്രാർക്ക് നിർദ്ദേശം നൽകിയതായി എൻ.ഐ.ടി ഡയറക്ടർ അറിയിച്ചു. അദ്ധ്യാപികയ്‌ക്കെതിരെ നടപടി ആവശ്യപ്പെട്ട് ലഭിച്ച പരാതിയിലാണ് എൻ.ഐ.ടി ഡയറക്ടർ പ്രസാദ് കൃഷ്ണയുടെ നടപടി. വിശദമായ അന്വേഷണത്തിന് ശേഷം തുടർ നടപടികൾ സ്വീകരിക്കുമെന്നും ഡയറക്ടർ അറിയിച്ചു.
