എറണാകുളം: ലോക്സഭാ തിരഞ്ഞെടുപ്പ് അടുത്തതോടെ സ്ഥാനാർത്ഥി നിർണയവുമായി ബന്ധപ്പെട്ട് നിരവധി അഭ്യൂഹങ്ങൾ സമൂഹമാദ്ധ്യമങ്ങളിൽ നിറയുന്നുണ്ട്. സിനിമാ താരങ്ങളെക്കുറിച്ചും ഇത്തരത്തിൽ നിരവധി പ്രചരണങ്ങളുണ്ട്. നടൻ സിദ്ദിഖ് ആലപ്പുഴയിൽ കോൺഗ്രസ് സ്ഥാനാർത്ഥിയായി മത്സിരിക്കുന്നെന്ന വാർത്തകളാണ് കുറച്ച് ദിവസങ്ങളായി പുറത്ത് വരുന്നത്. എന്നാൽ, പ്രചരിക്കുന്നതെല്ലാം അടിസ്ഥാനരഹിതമായ വാർത്തകളാണെന്ന് അറിയിച്ച് രംഗത്ത് വന്നിരിക്കുകയാണ് സിദ്ദിഖ്. ഒരു അഭിമുഖത്തിനിടയിലായിരുന്നു ഇക്കാര്യങ്ങൾ വെളിപ്പെടുത്തിയത്.
കുറച്ച് ദിവസമായി സമൂഹമാദ്ധ്യമങ്ങളിലടക്കം താനും ഇത്തരത്തിലെ വാർത്തകൾ കണ്ടിരുന്നു. പ്രചരിക്കുന്ന വാർത്തയിൽ ഒന്നും സത്യമില്ല. ഇത്തരത്തിലൊരു വാർത്ത എങ്ങനെയാണ് പ്രചരിച്ചതെന്ന് തനിക്ക് അറിയില്ലെന്നുമാണ് സിദ്ദിഖ് പറയുന്നത്. തിരഞ്ഞെടുപ്പിൽ മത്സരിക്കാൻ കോൺഗ്രസ് പാർട്ടിയിൽ നിന്നും ഇതുവരെയും ആരും സമീപിച്ചിട്ടുമില്ല, അത്തരത്തിലെ ചർച്ചകളും നടന്നിട്ടില്ലെന്നും സിദ്ദിഖ് വ്യക്തമാക്കി.
രാഷ്ട്രീയമായ നിലപാടുകളും കാഴ്ചപാടുകളുമുണ്ട്. എന്നാൽ, രാഷ്ട്രീയത്തിൽ പ്രവർത്തിക്കാൻ ഇതുവരെയും ഇതുവരെയും ഉദ്ദേശിച്ചിട്ടില്ലെന്നും സിദ്ദിഖ് അഭിമുഖത്തിൽ പറഞ്ഞു. രാഷ്ട്രീയത്തിൽ നിരവധി സൗഹൃദങ്ങളുണ്ട്. പക്ഷെ, ഒരു പാർട്ടിയിലും അംഗത്വം സ്വീകരിച്ചിട്ടില്ലെന്നും സിദ്ദിഖ് കൂട്ടിച്ചേർത്തു.