ജാം നഗർ : 12 അടി താഴ്ചയുള്ള കുഴൽക്കിണറിൽ വീണ രണ്ട് വയസ്സുകാരനെ സാഹസികമായി രക്ഷപെടുത്തി ഫയർഫോഴ്സ്. 10 മണിക്കൂർ രക്ഷാപ്രവർത്തനത്തിനിടെയാണ് കുട്ടിയെ അഗ്നിശമന സേനാംഗങ്ങൾ രക്ഷപെടുത്തിയത്.കുട്ടി ഇപ്പോൾ ജാംനഗറിലെ ആശുപത്രിയിൽ ചികിത്സയിലാണ്.
ജാംനഗർ ജില്ലയിലെ ലാൽപൂർ താലൂക്കിലെ ഗോവാന ഗ്രാമത്തിനടുത്തുള്ള വാഡി പ്രദേശത്താണ് സംഭവം . കഴിഞ്ഞ ദിവസമാണ് 200 കളിക്കുന്നതിനിടെയാണ് രണ്ട് വയസ്സുള്ള കുട്ടി കുഴൽക്കിണറിൽ വീണത്.
ജാംനഗറിൽ നിന്നുള്ള അഗ്നിശമനസേനാ സ്റ്റേഷൻ ഓഫീസർമാരായ കാമിൽ മേത്ത, രാകേഷ് ഗോകാനി, ജെൻ്റി സിന്ധവ് എന്നിവരടങ്ങുന്ന സംഘം മിനിറ്റുകൾക്കകം സംഭവം നടന്ന വാഡിയിലെത്തി. പിന്നാലെ കലവാട് അഗ്നിശമന സേനയും രക്ഷാപ്രവർത്തനത്തിനായി സ്ഥലത്തെത്തി. കുട്ടിയ്ക്ക് ഓക്സിജൻ ഉറപ്പാക്കിയ ശേഷമായിരുന്നു രക്ഷാപ്രവർത്തനം .
12 അടി താഴ്ചയിൽ കുടുങ്ങിയ കുട്ടിയെ രക്ഷിക്കാൻ രണ്ടര മീറ്റർ അകലെ 14 അടി താഴ്ചയുള്ള കുഴിയെടുത്തു.കുഴിയെടുത്ത് രക്ഷാസംഘം ക്രോസ് സെക്ഷൻ ഉണ്ടാക്കി. കുട്ടിക്ക് പരിക്കേൽക്കാതിരിക്കാൻ സംഘം ശ്രദ്ധിച്ചുകൊണ്ടിരുന്നു. ആശുപത്രിയിൽ എത്തുമ്പോൾ കുട്ടി അബോധാവസ്ഥയിലായിരുന്നു. ശ്വസിക്കാൻ ബുദ്ധിമുട്ട് അനുഭവപ്പെടുകയും രക്തസമ്മർദ്ദവും കുറയുകയും ചെയ്തു. കുട്ടിയുടെ നില ഗുരുതരമായതിനാൽ ഇപ്പോൾ വെൻ്റിലേറ്ററിലാണ്.
