ബോക്സോഫീസിൽ മികച്ച വിജയം നേടിയ ചിത്രങ്ങൾ റീ-റിലീസ് ചെയ്യുന്നത് ഇപ്പോൾ ഒരു ട്രെൻഡാണ്. അത്തരത്തിൽ ഈ വാലന്റെൻസ് ദിനത്തിൽ ഒരുപിടി ചത്രങ്ങളാണ് റിലീസിനൊരുങ്ങുന്നത്. വാലന്റൈൻസ് ദിനത്തോടനുബന്ധിച്ച് പ്രേമം ആണ് ആദ്യം റിലീസ് ചെയ്ത ചിത്രം. തമിഴ്നാട്ടിലാണ് ചിത്രം ഇപ്പോൾ പ്രദർശനം നടക്കുന്നത്. എട്ട് വർഷങ്ങൾക്ക് ശേഷവും ചിത്രത്തിന് തമിഴ്നാട്ടിൽ വൻ വരവേൽപ്പാണ് ലഭിച്ചിരിക്കുന്നത്.
കാർത്തിയും പ്രിയാമണിയും പ്രധാനവേഷത്തിലെത്തിയ പരുത്തിവീരനാണ് റീറിലീസിനൊരുങ്ങുന്ന മറ്റൊരു ചിത്രം. കഴിഞ്ഞ ദിവസമാണ് ചിത്രത്തിന്റെ അണിയറ പ്രവർത്തകർ റീറിലീസ് സംബന്ധിച്ച വാർത്തകൾ പുറത്തുവിട്ടത്. അമീർ രചനയും സംവിധാനവും നിർവ്വഹിച്ച ചിത്രം 2007 ഫെബ്രുവരിയിലാണ് പ്രദർശനത്തിനെത്തിയത്. 300 ദിവസത്തോളമാണ് തമിഴ്നാട്ടിൽ ചിത്രം പ്രദർശനം നടത്തിയത്. പരുത്തിവീരനും ഈ മാസം പ്രദർശനത്തിനെത്തും. എന്നാൽ റിലീസ് തീയതി പ്രഖ്യാപിച്ചിട്ടില്ല.
തൃഷയും വിജയ് സേതുപതിയും പ്രധാനവേഷത്തിൽ എത്തിയ 96 ആണ് മറ്റൊരു ചിത്രം. സി പ്രേംകുമാർ സംവധാനം ചിത്രം 2018 ലാണ് റിലീസ് ചെയ്തത്. തീയേറ്ററുകളിൽ മികച്ച വിജയം നേടിയ ചിത്രം ഫെബ്രുവരി 14 നാണ് തീയേറ്ററുകളിലെത്തുന്നത്. റീറിലീസ് സംബന്ധിച്ച വാർത്തകൾ അണിയറ പ്രവർത്തകരും തിങ്ക് മ്യൂസിക്കും പുറത്തുവിട്ടു. 18 കോടി ബജറ്റിൽ ഒരുങ്ങിയ ചിത്രത്തിന് ബോക്സ് ഓഫീസിൽ 50 കോടി കളക്ഷൻ ലഭിച്ചിരുന്നു.
ദുൽഖർ സൽമാനും ബോളിവുഡ് നായിക മൃണാൾ താക്കൂറും പ്രധാനവേഷങ്ങളിൽ എത്തിയ സീതാരാമമാണ് മറ്റൊരു ചിത്രം. സീതാരാമത്തിന്റെ അണിയറ പ്രവർത്തകർ തന്നെയാണ് ഈ വാർത്ത പുറത്തുവിട്ടത്. ഫെബ്രുവരി 14നാണ് ചിത്രം തീയേറ്ററുകളിലെത്തുന്നത്. തെലുങ്കിൽ മാത്രമേ ചിത്രത്തിന്റെ റീറിലീസ് ഉണ്ടാവുകയുള്ളു. 2022 ൽ പുറത്തുവന്ന ചിത്രത്തിൽ രശ്മിക മന്ദാനയും ശ്രദ്ധേയമായ വേഷത്തിൽ എത്തിയിരുന്നു.