മുംബൈ: ഇംഗ്ലണ്ടിനെതിരായ അവസാന മൂന്ന് ടെസ്റ്റ് പരമ്പരകൾക്കുള്ള ഇന്ത്യൻ ടീമിനെ പ്രഖ്യാപിച്ചു. വ്യക്തിപരമായ കാരണങ്ങളെ തുടർന്ന് ആദ്യ രണ്ട് ടെസ്റ്റിനും ഇല്ലാതിരുന്ന വിരാട് കോലി അവശേഷിക്കുന്ന ടെസ്റ്റിലും കളിക്കില്ല. ടെസ്റ്റിൽ അരങ്ങേറ്റം കുറിച്ചതിന് ശേഷം കോലി ആദ്യമായാണ് ഒരു പരമ്പരയിൽ നിന്നും വിട്ടുനിൽക്കുന്നത്.
പരിക്കിനെ തുടർന്ന് രണ്ടാം ടെസ്റ്റ് നഷ്ടമായ രവീന്ദ്ര ജഡേജയും കെ.എൽ. രാഹുലും ടീമിൽ തിരിച്ചെത്തി. ടീമിലുണ്ടെങ്കിലും ഇരുവരും കളിക്കുമോ എന്ന കാര്യത്തിൽ വ്യക്തതയില്ല. ഇരുവരുടേയും ഫിറ്റ്‌നസ് ബിസിസിഐ മെഡിക്കൽ സംഘം പരിശോധിച്ച ശേഷമായിരിക്കും അന്തിമ തീരുമാനം എടുക്കുക. രാജ്‌കോട്ടിൽ 15-നാണ് മൂന്നാം ടെസ്റ്റ്. 23 ന് റാഞ്ചിയിലും മാർച്ച് ഏഴിന് ധരംശാലയിലും നാലും അഞ്ചും ടെസ്റ്റുകൾ നടക്കും.
ഇന്ത്യൻ ടീം: രോഹിത് ശർമ്മ (ക്യാപ്റ്റൻ), ജസ്പ്രീത് ബുമ്ര (വൈസ് ക്യാപ്റ്റൻ), യശസ്വി ജയ്‌സ്വാൾ, ശുഭ്മeൻ ഗിൽ, കെ.എൽ. രാഹുൽ, രജത് പട്ടീദാർ, സർഫറാസ് ഖാൻ, ധ്രുവ് ജുറേൽ, കെ.എസ്. ഭരത്, ആർ. അശ്വിൻ, രവീന്ദ്ര ജഡേജ, അക്ഷർ പട്ടേൽ, വാഷിംഗ്ടൺ സുന്ദർ, കുൽദീപ് യാദവ്, മുഹമ്മദ് സിറാജ്, മുകേഷ് കുമാർ, ആകാശ് ദീപ്.
