തന്റെ സിനിമാ ജീവിതത്തിൽ 55 വർഷങ്ങൾ പൂർത്തിയാക്കിയതിന്റെ സന്തോഷം പങ്കുവച്ച് ബോളിവുഡ് സൂപ്പർ താരം അമിതാഭ് ബച്ചൻ. എക്സിലൂടെയാണ് ബച്ചൻ ഈ സന്തോഷ വാർത്ത പങ്കുവച്ചത്. എഐ സാങ്കേതികവിദ്യയിൽ തയാറാക്കിയ തന്റെ ചിത്രങ്ങൾ പങ്കുവച്ചുകൊണ്ടാണ് ബച്ചൻ ഇക്കാര്യം അറിയിച്ചത്. ‘സിനിമയുടെ അത്ഭുതലോകത്ത് 55 വർഷങ്ങൾ പൂർത്തിയാക്കുന്നു’എന്ന് അടിക്കുറിപ്പോടെയാണ് ബച്ചൻ ചിത്രങ്ങൾ പങ്കുവച്ചിരിക്കുന്നത്.
T 4924 – 55 years in the wondrous world of Cinema .. and AI , gives me its interpretation ❤️ ..
a presentation by Ef B .. self made 🙏 pic.twitter.com/uQbyf8EjE8— Amitabh Bachchan (@SrBachchan) February 16, 2024
1969-ൽ ഖ്വാജാ അഹ്മദ് അബ്ബാസ് സംവിധാനം ചെയ്ത ‘സാത് ഹിന്ദുസ്ഥാനി’ എന്ന ചിത്രത്തിലൂടെയാണ് അമിതാഭ് ബച്ചൻ സിനിമാരംഗത്ത് അരങ്ങേറ്റം കുറിച്ചത്. ഈ ചിത്രത്തിലൂടെ മികച്ച പുതുമുഖത്തിനുള്ള ദേശീയ പുരസ്കാരം ബച്ചൻ സ്വന്തമാക്കിയിരുന്നു. ‘രേഷ്മ ഓർ ഷേറ’ എന്ന ചിത്രത്തിലെ അഭിനയത്തിലൂടെയാണ് അദ്ദേഹം ബോളിവുഡ് സിനിമാലോകത്ത് ശ്രദ്ധേയനായത്. ആരാധകർക്കിടയിൽ ‘ബിഗ്ബി’ എന്നറിയപ്പെടുന്ന ബച്ചൻ ലോകമെമ്പാടും ആരാധകരെ സ്വന്തമാക്കിയിട്ടുണ്ട്.
1970-80 കാലം ബച്ചന്റെ സുവർണ കാലഘട്ടമായിരുന്നു. ഷോലെ, ദീവാർ, സഞ്ജീർ, ‘അമർ അക്ബർ അന്തോണി, ഡോൺ, ഷഹെൻഷാ എന്നിവയാണ് അദ്ദേഹത്തിന്റെ ഏറ്റവും ശ്രദ്ധേയമായ സിനിമകൾ. മികച്ച നടനുള്ള ദേശീയ ചലച്ചിത്ര അവാർഡും ഫിലിംഫെയർ അവാർഡുകളുമുൾപ്പെടെ നിരവധി അവാർഡുകൾ ബച്ചന് ലഭിച്ചിട്ടുണ്ട്.
ഈ മാസം ആദ്യം അമിതാഭ് ബച്ചൻ അയോദ്ധ്യാ രാമക്ഷേത്രത്തിൽ ദർശനം നടത്തിയിരുന്നു. ക്ഷേത്ര ദർശനത്തിന്റെ വീഡിയോകളും ചിത്രങ്ങളും ബച്ചൻ സമൂഹമാദ്ധ്യമത്തിൽ പങ്കുവക്കുകയും ചെയ്തു.
