തിരുവനന്തപുരം: കോവളത്തെ ഹവ്വാ ബീച്ചിൽ കുളിക്കുന്നതിനിടെ കടലിൽ അടിയൊഴിക്കിൽപ്പെട്ട് മുങ്ങിപ്പോയ രണ്ട് യുവാക്കളെ രക്ഷപ്പെടുത്തി ലൈഫ്ഗാർഡ്. ആന്ധ്രാ പ്രദേശിൽ നിന്നും കോവളത്ത് എത്തിയ വിഷ്ണു ശരത്, അക്ഷയ് എന്നിവരാണ് അപകടത്തിൽപ്പെട്ടത്.
ഞായറാഴ്ച രാവിലെ 7.45-ഓടെയായിരുന്നു സംഭവം. കടലിൽ കുളിക്കവെ തിരയിൽ മുങ്ങിപ്പോവുകയായിരുന്നു. അടിയൊഴുക്കിൽപ്പെട്ട് താഴ്ന്ന ഇവരുടെ കൈകൾ മാത്രമാണ് മുകളിലേക്ക് കണ്ടത്. തുടർന്ന് ഒപ്പമുണ്ടായിരുന്നവർ നിലവിളിച്ചതോടെ ലൈഫ്ഗാർഡ് ഉദ്യോഗസ്ഥരെത്തി രക്ഷപ്പെടുത്തുകയായിരുന്നു.
ലൈഫ്ഗാർഡ് സൂപ്പർവൈസർ സുന്ദരേശൻ, ഗാർഡുകളായ മനോഹരൻ, രജീഷ് കുമാർ, റോബിൻസൺ, പിരു മുഹമ്മദ് എന്നിവരാണ് രക്ഷപ്പെടുത്തിയത്. കരയ്ക്കെത്തിച്ച ഇവർക്ക് പ്രാഥമിക ചികിത്സ നൽകി.
