യുവതാരങ്ങളെ അണിനിരത്തി നാദിർഷ സംവിധാനം ചെയ്യുന്ന ഏറ്റവും പുതിയ ചിത്രമാണ് വൺസ് അപ്പ് ഓൺ എ ടൈം ഇൻ കൊച്ചി. അർജുൻ അശോകനും ഷൈൻ ടോം ചാക്കോയും പ്രധാന വേഷങ്ങളിൽ എത്തുന്ന ചിത്രത്തിൽ സംവിധായകനും തിരക്കഥാകൃത്തുമായ റാഫിയുടെ മകൻ മുബിൻ റാഫിയാണ് നായകൻ. ഇപ്പോഴിതാ ചിത്രത്തിന്റെ ഒരു സുപ്രധാനമായ അപ്ഡേറ്റ് പങ്കുവച്ചിരിക്കുകയാണ് അണിയറ പ്രവർത്തകർ.
സിനിമയുടെ റിലീസ് മാറ്റിവച്ചെന്ന വാർത്തയാണ് പുറത്തുവരുന്നത്. ഫെബ്രുവരി 23 നാണ് ചിത്രത്തിന്റെ റിലീസ് തീരുമാനിച്ചിരുന്നത് എന്നാൽ ഇത് മാർച്ച് ഒന്നിലേക്ക് മാറ്റിയിരിക്കുകയാണ്. തീയേറ്റർ ഉടമകളുടെ സംഘടനായ ഫിയോക്ക് 22 മുതൽ സമരം പ്രഖ്യാപിച്ചിരിക്കുന്ന സാഹചര്യത്തിലാണ് റിലീസ് നീട്ടിയതെന്നും അണിയറ പ്രവർത്തകർ അറിയിച്ചു.
കോമഡി ത്രില്ലറായി ഒരുങ്ങുന്ന ചിത്രത്തിന്റെ ട്രെയിലർ കഴിഞ്ഞ ദിവസമാണ് പുറത്തുവിട്ടത്. കൊച്ചിയുടെ പശ്ചാത്തലത്തിലാണ് ചിത്രം ഒരുക്കിയിരിക്കുന്നത്. ശക്തമായൊരു പോലീസ് വേഷത്തിലാണ് ചിത്രത്തിൽ അർജുൻ അശോകൻ എത്തുന്നത്. ദേവിക സഞ്ജയ് ആണ് ചിത്രത്തിലെ നായിക. റാഫിയാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്.
കലന്തൂർ എന്റർടൈൻമെന്റ്സിന്റെ ബാനറിൽ കലന്തൂർ തന്നെയാണ് സിനിമയുടെ നിർമ്മാണം. ഹിഷാം അബ്ദുൽ വഹാബ് ആണ് സംഗീതം ഒരുക്കുന്നത്. ചിത്രത്തിന്റെ ഛായാഗ്രഹണം നിർവഹിക്കുന്നത് ഷാജി കുമാർ, എഡിറ്റർ -ഷമീർ മുഹമ്മദ്, മേക്കപ്പ് -റോണെക്സ് സേവ്യർ, അസോസിയേറ്റ് ഡയറക്ടർ -ദീപക് നാരായൺ, പി.ആർ.ഒ -മഞ്ജു ഗോപിനാഥ്.