കോഴിക്കോട്: മെറ്റലുമായി പോകുകയായിരുന്ന ടിപ്പർ ലോറിയുടെ ഡീസൽ ടാങ്ക് ചോർന്ന് റോഡിൽ പടർന്നതിനെ തുടർന്ന് തെന്നിവീണ് ബൈക്ക് യാത്രികന് പരിക്ക്. സംസ്ഥാനപാത മലയോര ഹൈവേയിലെ പുല്ലൂരാംപാറ-നെല്ലിപ്പൊയിൽ റോഡിൽ മഞ്ഞുവയലിലാണ് സംഭവം. ഇന്ന് രാവിലെ 8.30-ഓടെയായിരുന്നു സംഭവങ്ങൾക്ക് തുടക്കം.
ലോറിയുടെ ഡീസൽ ടാങ്കിൽ നിന്നുള്ള ഒരു വാൽവിൽ ലീക്ക് ഉണ്ടാകുകയായിരുന്നു. എന്നാൽ ഡ്രൈവർ ഇതറിഞ്ഞിരുന്നില്ല. ഒരു കിലോമീറ്ററോളം ദൂരത്തിൽ ഡീസൽ റോഡിൽ ഒഴുകിയിരുന്നു. ലോറിക്ക് പിന്നിലുണ്ടായിരുന്ന ബൈക്ക് യാത്രികൻ സംഭവം ശ്രദ്ധയിൽപ്പെട്ടതിനെ തുടർന്ന് ലോറി തടഞ്ഞ് ഡ്രൈവറോട് വിവരം ധരിപ്പിക്കുകയായിരുന്നു. എന്നാൽ റോഡിൽ പരന്ന ഡീസൽ ടാങ്കിൽ തെന്നിവീണ് ഒരു ബൈക്ക് യാത്രികന് പരിക്കേറ്റിരുന്നു.
നെല്ലിപ്പൊയിലിലെ ലോട്ടറിക്കടയിൽ ജീവനക്കാരനായ അരീക്കോട് സ്വദേശി അഖിലിനാണ് പരിക്കേറ്റത്.കൈക്ക് സാരമായി പരിക്കേറ്റ ഇയാളെ ആശുപത്രിയിൽ പ്രവേശിപ്പിച്ചിരിക്കുകയാണ്. കൈക്ക് പൊട്ടലുള്ളതിനാൽ ശസ്ത്രക്രിയക്ക് നിർദ്ദേശിച്ചിട്ടുണ്ട്. സംഭവത്തിന് പിന്നാലെ അഗ്നിരക്ഷാ സേനയെത്തി വെള്ളവും സോപ്പും ഉപയോഗിച്ച് കഴുകി ഗതാഗതം പുനഃസ്ഥാപിക്കുകയായിരുന്നു.