ഒരു സിനിമ കണ്ട് കഴിയുമ്പോൾ നമ്മിൽ പലരുടെയും മനസിലേക്ക് ഓടിയെത്തുന്നത് ആ ചിത്രത്തിലെ സ്ഥലങ്ങളായിരിക്കും. ഒരിക്കല്ലെങ്കിലും പോകണമെന്നു തോന്നിയ സ്ഥലങ്ങൾ! ആനന്ദത്തിലെ ഹംപിയും ചാർലിയിലെ മീശപ്പുലി മലയും അത്തരത്തിൽ നമ്മുടെ മനസിൽ ഇടം നേടിയ സ്ഥലങ്ങളായിരിക്കും. ഇപ്പോൾ ട്രെൻഡിംഗിൽ നിൽക്കുന്ന സ്ഥലം ചിദംബരത്തിന്റെ സംവിധാനത്തിൽ സൗബിൻ, ശ്രീനാഥ് ഭാസി എന്നിവരെ കേന്ദ്ര കഥാപാത്രങ്ങളാക്കി തിയേറ്ററുകളിലെത്തിയ മഞ്ഞുമ്മൽ ബോയ്സ് ചിത്രത്തിലെ ഗുണാ കേവുകളാണ്. അറിയാം..
തമിഴ്നാട്ടിലെ കൊടൈക്കനാലിൽ സ്ഥിതി ചെയ്യുന്ന ഗുണാ കേവ്സ് ‘ പില്ലർ റോക്സ് കേവ്സ്’ എന്നും അറിയപ്പെടുന്നു. ഗുഹയ്ക്ക് സമീപമുള്ള പ്രദേശവാസികൾ ഈ ഗുഹയെ ‘ഡെവിൾസ് ഓഫ് കിച്ചൺ’ എന്നാണ് വിളിക്കുന്നത്. അതിനൊരു കാരണവുമുണ്ട്. ഭൂതങ്ങൾ അധിവസിക്കുന്ന ഗുഹയെന്നാണ് പ്രദേശവാസികൾ വിശ്വസിച്ചു പോരുന്നത്. 1991ൽ പുറത്തിറങ്ങിയ കമൽഹാസൻ- റോഷ്നി ചിത്രത്തിന്റെ പ്രസക്ത ഭാഗങ്ങൾ ചിത്രീകരിച്ചിരിക്കുന്നത് ഇവിടെയാണ്. അതിനാലാണ് ഗുണ കേവ്സ് എന്ന് ഈ ഗുഹകൾക്ക് പേര് വരാൻ കാരണം. ഇപ്പോൾ മഞ്ഞുമ്മൽ ബോയ്സ് ഇറങ്ങിയതോടെ ഗുണാ കേവുകൾ കാണാനുള്ള വിനോദ സഞ്ചാരികളുടെ ആഗ്രഹം ഇരട്ടിയായിരിക്കുകയാണ്. അപ്പോൾ എങ്ങനെയാ ബാഗുകൾ പാക്ക് ചെയ്യല്ലേ? ഗുണ കേവ്സിലേക്ക് യാത്ര തിരിക്കാം..
സാഹസികർക്ക് തിരഞ്ഞെടുക്കാവുന്ന മികച്ച സ്ഥലമാണിത്. ദുർഘടം പിടിച്ച പാതകളിലൂടെയും ഇടുങ്ങിയ വഴികളിലൂടെയും മരങ്ങളുടെ വേരുകൾക്കിടയിലൂടെ നൂർന്നും നിരങ്ങിയും വേണം ഇവിടേക്ക് എത്തിച്ചേരാൻ. ഇവിടേക്കുള്ള യാത്രയിലെ ചെറിയ അശ്രദ്ധ പോലും നമ്മെ അപകടത്തിലെത്തിച്ചേക്കാം. ഗുഹയുടെ അകത്തേക്ക് പ്രവേശിച്ചാൽ പിന്നെ ഇരുട്ട് നിറഞ്ഞ ലോകമാണ് നിങ്ങളെ കാത്തിരിക്കുന്നത്. ഗുഹയുടെ വിടവുകളിലൂടെ സൂര്യപ്രകാശം അരിച്ചിറങ്ങിയാൽ മാത്രം ചെറിയ വെളിച്ചം കാണാം. ഇതിനുള്ളിലെ വഴുക്കലുള്ള ഭാഗങ്ങളിലൂടെയുള്ള യാത്ര ശരിക്കും ഭയാനകമാണ്. നിങ്ങൾ പോകുന്ന സമയങ്ങളിൽ ശക്തമായ മഴ പെയ്യുകയാണെങ്കിൽ അവിടെ കുടുങ്ങി കിടക്കാനുള്ള സാധ്യതയുമുണ്ട്.
ഈ ഗുഹയിലേക്ക് പ്രവേശിക്കുമ്പോൾ ഇതിനെ കുറിച്ച് കൃത്യമായി അറിയാവുന്ന ആരെയെങ്കിലും കൂടെ കൂട്ടാൻ ശ്രദ്ധിക്കണം. ടോർച്ച്, ചെരുപ്പുകൾ, ഹെഡ്ലാമ്പുകൾ തുടങ്ങിയ അവശ്യ വസ്തുക്കൾ കയ്യിൽ കരുതാൻ ശ്രദ്ധിക്കണം. ജാഗ്രതയോടെ പോയി വരേണ്ട സ്ഥലമാണിതെങ്കിലും വിനോദസഞ്ചാരികൾക്ക് പ്രകൃതിയുടെ സൗന്ദര്യം ആസ്വദിക്കാനുള്ള അവസരം കൂടിയാണ് ഗുണാ കേവുകളിലേക്കുള്ള ഓരോ യാത്രകളും.
