മലയാള സിനിമയിലെ യുവനിരയുടെ ഏറ്റവും വലിയ ഹിറ്റായി മാറുകയാണ് മഞ്ഞുമ്മൽ ബോയ്സ്. ചിത്രം പ്രേക്ഷകർ പ്രതീക്ഷിച്ചതുപോലെ തന്നെ ഒരു സർവൈവർ ത്രില്ലറാണ്. ചിത്രം നാലു ദിവസം കൊണ്ട് ആഗോള ബോക്സോഫീസിൽ എത്രനേടിയെന്ന റിപ്പോർട്ടാണ് അണിയറപ്രവർത്തകർ ഇപ്പോൾ പുറത്ത് വിട്ടിരിക്കുന്നത്.
ട്രേഡ് അനലിസ്റ്റുകളുടെ പ്രവചനം തെറ്റിയില്ല എന്നു തന്നെ പറയാവുന്ന തരത്തിലാണ് റിപ്പോർട്ട്. നാലു ദിവസം കൊണ്ട് ചിത്രം 36 കോടി കഴിഞ്ഞിരിക്കുകയാണ്. ആഗോളതലത്തിൽ 36.11 കോടിയാണ് നേടിയിരിക്കുന്നത്. കേരളത്തിൽ മാത്രമല്ല, മറ്റു ഭാഷകളിലും ചിത്രത്തിന് മികച്ച പ്രതികരണമാണ് ലഭിക്കുന്നത്.
യഥാർത്ഥ കഥയെ അതുപോലെ പ്രേക്ഷകരുടെ ഹൃദയത്തിൽ എത്തിക്കാൻ ചിദംബരത്തിന് കഴിഞ്ഞു എന്നതാണ് സിനിമയുടെ ഏറ്റവും വലിയ വിജയം. ചിദംബരം തന്നെയാണ് സിനിമയുടെ തിരക്കഥ ഒരുക്കിയതും. കൊച്ചിയിൽ നിന്നും ഒരു സംഘം യുവാക്കൾ വിനോദയാത്രയുടെ ഭാഗമായി കൊടൈക്കനാലിൽ പോകുന്നതും അവിടെ അഭിമുഖീകരിക്കേണ്ടി വരുന്ന സംഭവ വികാസങ്ങളുമാണ് സിനിമയുടെ ഇതിവൃത്തം. സൗബിൻ ഷാഹിർ, ശ്രീനാഥ് ഭാസി, ബാലു വർഗീസ്, ഗണപതി, ലാൽ ജൂനിയർ, അഭിറാം രാധാകൃഷ്ണൻ, ദീപക് പറമ്പോൽ, ഖാലിദ് റഹ്മാൻ, അരുൺ കുര്യൻ, ചന്തു സലിംകുമാർ, വിഷ്ണു രഘു എന്നിവരാണ് പ്രധാന വേഷങ്ങളിലെത്തുന്നത്.
