യാമി ഗൗതം നായികയായ ഏറ്റവും പുതിയ ചിത്രമാണ് ആർട്ടിക്കിൾ 370. ചിത്രം വാരാന്ത്യത്തിൽ നേടിയത് വമ്പൻ കളക്ഷൻ. നാല് ദിവസത്തിനിടെ ചിത്രം 29. 05 കോടി യോളം കളക്ഷൻ നേടി. ഇക്കാര്യം സമൂഹ മാദ്ധ്യമങ്ങളിലൂടെ യാമി ഗൗതം തന്നെയാണ് ആരാധകരുമായി പങ്കുവച്ചത്. വെള്ളിയാഴ്ച മാത്രം ചിത്രത്തിന്റെ ബോക്സോഫീസ് കളക്ഷൻ 6. 12 കോടിയാണ്. ശനിയാഴ്ച 9. 08 കോടി, ഞായറാഴ്ച 10. 25 കോടി, തിങ്കൾ 3.06 കോടി എന്നിങ്ങനെയാണ് ചിത്രത്തിന്റ കളക്ഷൻ റിപ്പോർട്ടുകൾ.
‘ആർട്ടിക്കിൾ 370’ എന്ന ചിത്രത്തിന് പ്രേക്ഷകരിൽ നിന്ന് മികച്ച പ്രതികരണമാണ് ലഭിക്കുന്നത്. രണ്ടാം ദിനം ചിത്രത്തിന്റെ വരുമാനത്തിലും കുതിച്ചുചാട്ടമുണ്ടായി. ചിത്രത്തിൽ യാമി ശ്രദ്ധേയ പ്രകടനമാണ് കാഴ്ചവച്ചിരിക്കുന്നത്. സൂനി ഹക്സർ എന്ന രഹസ്യാന്വേഷണ ഉദ്യോഗസ്ഥയുടെ വേഷത്തിലാണ് താരം എത്തുന്നത്. ചിത്രം പൂർണമായും ജമ്മു കശ്മീരിലാണ് ചിത്രീകരിച്ചിരിക്കുന്നത്. ആദിത്യ സുഹാഷ് ജംഭാലെയാണ് ചിത്രം സംവിധാനം ചെയ്തിരിക്കുന്നത്. ആദിത്യ ധർ, അർജുൻ ധവാൻ, സംവിധായകൻ ആദിത്യ എന്നിവർ ചേർന്നാണ് ചിത്രത്തിന്റെ രചന നിർവഹിച്ചിരിക്കുന്നത്.
കശ്മീരിലെ വിഘടനവാദവും തീവ്രവാദവും അവസാനിപ്പിക്കാൻ വേണ്ടി കേന്ദ്രസർക്കാർ ആർട്ടിക്കിൾ 370 പിൻവലിച്ച സാഹചര്യത്തെ ആസ്പദമാക്കിയാണ് സിനിമ ഒരുക്കിയിരിക്കുന്നത്. നിയമം റദ്ദാക്കാൻ കേന്ദ്രസർക്കാർ സ്വീകരിച്ച മുന്നൊരുക്കങ്ങളും ഇതിനായി കശ്മീർ താഴ്വരയിൽ പ്രവർത്തിച്ച പ്രത്യേക സുരക്ഷാ സംഘത്തിന്റെയും കഥയാണ് ‘ആർട്ടിക്കിൾ 370’. ജ്യോതി ദേശ്പാണ്ഡെ, ആദിത്യ ധാർ, ലോകേഷ് ധാർ എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. ചിത്രത്തിൽ പ്രിയ മണിയും ശ്രദ്ധേയമായൊരു വേഷത്തിൽ എത്തുന്നുണ്ട്.