അംബാനി കുടുംബത്തിലെ പുതിയ ആഘോഷത്തിന്റെ വിശേഷങ്ങളാണ് സമൂഹമാദ്ധ്യമങ്ങളിൽ നിറയുന്നത്. അനന്ത് അംബാനി-രാധിക മെര്ച്ചന്റ് പ്രീവെഡ്ഡിംഗ് ആഘോഷത്തിലെത്തുന്ന അതിഥികളും പ്രീവെഡ്ഡിംഗിനായി ഒരുക്കിയിരിക്കുന്ന ഭക്ഷണത്തിന്റെ മെനുവുമെല്ലാം വാർത്തയായി മാറിയിരിക്കുകയാണ്. ചടങ്ങിൽ അനന്ത് അംബാനിയും രാധിക മെർച്ചന്റും ധരിക്കുന്ന വസ്ത്രങ്ങളെക്കുറിച്ചുള്ള വിശേഷങ്ങളാണ് ഇപ്പോൾ പുറത്ത് വരുന്നത്.
ചടങ്ങിന് മാറ്റ് കൂട്ടാനായി ബോളിവുഡിന്റെ സ്വന്തം ഡിസൈനര് മനീഷ് മല്ഹോത്ര ഡിസൈൻ ചെയ്ത വസ്ത്രങ്ങളാണ് ഇരുവരും ധരിക്കുന്നത്. മനീഷ് പ്രത്യേകം ഡിസൈന് ചെയ്ത വസ്ത്രങ്ങളാണ് അനന്ത് അംബാനിയും-രാധിക മെര്ച്ചന്റും ധരിക്കുക. മനീഷ് മല്ഹോത്രയുടെ പേര് അച്ചടിച്ച വസ്ത്രങ്ങളുടെ പാക്കറ്റുകള് ജാംനഗര് എയർപോട്ടിലെത്തിയിരുന്നു. എട്ടോളം ഹാംഗറുകളില് തൂക്കിയ വസ്ത്രങ്ങളുടെ പാക്കറ്റുകള് ജീവനക്കാർ കൊണ്ടു പോകുന്നതിന്റെ വീഡിയോയും പുറത്ത് വന്നിരുന്നു.
മൂന്ന് ദിവസം നീണ്ടു നിൽക്കുന്ന ഈ ആഘോഷത്തിന് കഴിഞ്ഞ ദിവസമായിരുന്നു തുടക്കം കുറിച്ചത്. അംബാനി കുടുംബത്തിന്റെ ജാംനഗറിലുള്ള റിഫൈനറി ടൗണ്ഷിപ്പിലാണ് ആഘോഷപരിപാടികള് നടക്കുന്നത്. ബന്ധുക്കളെയും സുഹൃത്തുക്കളെയും കൂടാതെ വ്യാവസായിക സിനിമാ മേഖലകളിലെ നിരവധി പ്രമുഖരും പങ്കെടുത്തിരുന്നു.
ആഘോഷങ്ങള് തുടങ്ങിയതിന് മുമ്പ് തന്നെ മകന്റെ വിവാഹത്തെപ്പറ്റിയുള്ള തന്റെ ആഗ്രഹങ്ങള് പങ്കുവെച്ച് നിത അംബാനിയും രംഗത്തെത്തിയിരുന്നു. 2023 ജനുവരിയിൽ മുംബൈയിലെ കുടുംബ വസതിയിൽ വച്ചായിരുന്നു ആനന്ദ് അംബാനിയും രാധികാ മെർച്ചൻ്റും തമ്മിലുള്ള വിവാഹം നിശ്ചയിച്ചത്.
