ജയ്പൂർ: വരുന്ന ലോക്‌സഭാ തിരഞ്ഞെടുപ്പിൽ രാജസ്ഥാനിലെ ചുരു മണ്ഡലത്തിൽ എൻഡിഎ സ്ഥാനാർത്ഥിയായി ഇതിഹാസ പാരാലിമ്പിക്സ് കായിക താരം ദേവേന്ദ്ര ജജാരിയ മത്സരിക്കും. ന്യൂഡൽഹിയിൽ വച്ച് ഇന്നലെയാണ് 195 ബിജെപി സ്ഥാനാർത്ഥികളുടെ ആദ്യഘട്ട പട്ടിക പുറത്തുവിട്ടത്. ഇതിൽ രാജസ്ഥാനിലെ 15 മണ്ഡലങ്ങളിലെ സ്ഥാനാർത്ഥികളുണ്ടായിരുന്നു. 1999 മുതൽ ബിജെപിയുടെ ശക്തി കേന്ദ്രമാണ് ചുരു. വരുന്ന ലോക്‌സഭാ തിരഞ്ഞെടുപ്പിൽ ചുരു സ്വദേശി തന്നെയായ ദേവേന്ദ്ര ജജാരിയയുടെ വിജയ സാധ്യതയും ഇതിനാൽ വർദ്ധിക്കുകയാണ്.
42കാരനായ ദേവേന്ദ്ര ജജാരിയ സമ്മർ പാരാലിമ്പിക്സ് ഗെയിമിൽ 2 സ്വർണ മെഡൽ കരസ്ഥമാക്കുന്ന ആദ്യ ഇന്ത്യക്കാരനാണ്. 2020ലെ ടോക്കിയോ പാരലിമ്പിക്‌സ് മത്സരങ്ങളിൽ സിൽവറും 2013ലെ IPC ലോക ചാമ്പ്യൻഷിപ്പ് മത്സരത്തിൽ സ്വർണവും ഇന്ത്യക്കായി അദ്ദേഹം സമ്മാനിച്ചിട്ടുണ്ട്. 2012ൽ പത്മശ്രീ പുരസ്‌കാരം ലഭിച്ച ആദ്യ പാരലിമ്പിക്‌സ് കായിക താരമാണ് അദ്ദേഹം. 2017ൽ ഇന്ത്യയുടെ പരമോന്നത കായിക ബഹുമതിയായ മേജർ ധ്യാൻചന്ദ് ഖേൽ രത്നയും 2022-ൽ പത്മഭൂഷണും നൽകി രാജ്യം അദ്ദേഹത്തെ ആദരിച്ചിരുന്നു.
