ന്യൂഡൽഹി: പ്രധാനമന്ത്രി നരേന്ദ്രമോദി, ആഭ്യന്തര മന്ത്രി അമിത് ഷാ, ബിജെപി ദേശീയ അദ്ധ്യക്ഷൻ ജെ.പി നദ്ദ എന്നിവർക്ക് നന്ദി അറിയിച്ച് ന്യൂഡൽഹി സ്ഥാനാർത്ഥി ബാൻസുരി സ്വരാജ്. എൻഡിഎ സർക്കാരിന്റെ കാലത്താണ് ഭാരതം ലോകത്തിലെ അഞ്ചാമത്തെ വലിയ സാമ്പത്തികശക്തിയായി മാറിയത്. രാജ്യത്തെ ജനങ്ങൾക്കൊപ്പമാണ് എൻഡിഎ സർക്കാർ എന്നും നിലനിൽക്കുന്നതെന്നും അവർ പറഞ്ഞു. ലോക്‌സഭാ തിരഞ്ഞെടുപ്പിനായുള്ള പ്രചരണത്തിനിടെ മാദ്ധ്യമങ്ങളോട് പ്രതികരിക്കുകയായിരുന്നു അവർ.
അഴിമതിയിൽ മുങ്ങികുളിച്ച് നിൽക്കുന്ന ആംആദ്മിയുടെ ഭരണം ഡൽഹിയിലെ ജനങ്ങൾക്ക് മടുത്തു. ബുദ്ധിയും ബോധവുമുള്ള ജനങ്ങളാണ് ഇവിടെയുള്ളത്. അവർ ലോക്‌സഭാ തിരഞ്ഞെടുപ്പിൽ ബിജെപിക്കൊപ്പം നിൽക്കുമെന്നും അവർ കൂട്ടിച്ചേർത്തു.
അമ്മ സുഷ്മ സ്വരാജിന്റെ പാരമ്പര്യം കാത്തുസൂക്ഷിക്കുമെന്നും സ്വർഗ്ഗത്തിലിരുന്ന് അമ്മ അനുഗ്രഹാശിസ്സുകൾ നൽകുമെന്നും സ്ഥാനാർത്ഥി പ്രഖ്യാപനത്തിന് ശേഷം ബാൻസുരി സ്വരാജ് മാദ്ധ്യമങ്ങളോട് പ്രതികരിച്ചു. ഞാൻ എന്നുള്ള വ്യക്തിക്കുള്ള നേട്ടമല്ല, ഇത് ഡൽഹിയിലെ ഓരോ ബിജെപി പ്രവർത്തകർക്കുള്ള നേട്ടമാണെന്നും അവർ പറഞ്ഞു. അഭിഭാഷക കൂടിയായ ബാൻസുരി സ്വരാജ്, ബിജെപി ഡൽഹി ലീഗൽ സെല്ലിന്റെ കോ-കൺവീനർ കൂടിയാണ്.
