കോഴിക്കോട്: കാലിക്കറ്റ് യൂണിവേഴ്സിറ്റി ക്യാമ്പസിൽ മഞ്ഞപ്പിത്തം വ്യാപിക്കുന്നു. വിദ്യാർത്ഥികൾ, അദ്ധ്യാപകർ, ജീവനക്കാർ തുടങ്ങി കാമ്പസിലേക്കെത്തുന്ന സന്ദർശകരെല്ലാം മഞ്ഞപ്പിത്ത രോഗത്തിന്റെ കാര്യത്തിൽ ജാഗ്രത പുലർത്തണമെന്ന് സർവകലാശാല നിർദ്ദേശം നൽകി. കാമ്പസിലെ എല്ലാ അന്തേവാസികളും ജല ഉപഭോഗം, പൊതു ആരോഗ്യം എന്നിവയുമായി ബന്ധപ്പെട്ട് ആരോഗ്യവും സുരക്ഷയും ഉറപ്പാക്കുന്നതിന് അടിയന്തര മുൻകരുതലുകളും നടപടികളും സ്വീകരിക്കണമെന്നും സർവകലാശാല ഉത്തരവിൽ പറയുന്നുണ്ട്.
അതേസമയം മലപ്പുറത്ത് വൈറൽ ഹെപ്പറ്റൈറ്റിസ് പടർന്നു പിടിക്കുന്നതിനാൽ മഞ്ഞപിത്തം ഈ രോഗത്തിന്റെ ഭാഗമാണോയെന്ന സംശയവും നിലനിൽക്കുന്നുണ്ട്. മഞ്ഞപ്പിത്തവുമായി ബന്ധപ്പെട്ട ലക്ഷണങ്ങൾ ശ്രദ്ധയിൽപ്പെടുകയാണെങ്കിൽ ഉടനടി ആശുപത്രിയിൽ ചികിത്സ തേടണമെന്നും സ്വയം ചികിത്സയ്ക്ക് നിൽക്കരുതെന്നും നിർദ്ദേശമുണ്ട്. പനി, ഛർദ്ദി, മൂത്രത്തിന് മഞ്ഞ നിറം, കണ്ണിന് മഞ്ഞ നിറം, വയറിളക്കം തുടങ്ങിയവയാണ് ഇതിന്റെ പ്രധാന ലക്ഷണങ്ങൾ.
