രാം ചരൺ തേജയുടെ നായികയാകാൻ ഒരുങ്ങി നടി ജാൻവി കപൂർ. തെലുങ്കിലെ നവാഗത സംവിധായകനായ ബുച്ചി ബാബു സനയുടെ ചിത്രത്തിലാണ് ഇരുവരും ഒരുമിക്കുന്നത്. ആർസി 16 എന്ന് താൽക്കാലികമായി പേര് നൽകിയിരിക്കുന്ന ചിത്രത്തിന്റെ ഔദ്യോഗിക പ്രഖ്യാപനം ഇന്ന് നടന്നു. ജാൻവി കപൂറിന്റെ ജന്മദിനത്തിലായിരുന്നു പഖ്യാപനം നടന്നത്.
നേരത്തെ പിതാവ് ബോണി കപൂർ നൽകിയ ഒരു അഭിമുഖത്തിൽ ജാൻവിയുടെ ചിത്രങ്ങളെ കുറിച്ച് സംസാരിച്ചിരുന്നു. രാം ചരൺ തേജയ്ക്കൊപ്പമായിരിക്കും ജാൻവി അടുത്തതായി അഭിനയിക്കുന്നതെന്നും ബോണികപൂർ പറഞ്ഞിരുന്നു. ബോളിവുഡ് സിനികളിലൂടെ ശ്രദ്ധേയയായ ജാൻവി ഇപ്പോൾ തെന്നിന്ത്യൻ സിനിമകളിലേക്കും ശ്രദ്ധ കേന്ദ്രീകരിച്ചിരിക്കുകയാണ്.
ആർസി 16 ന്റെ ചിത്രീകരണം ഉടൻ ആരംഭിക്കും. മൈത്രി മൂവി മേക്കേഴ്സ് പ്രൊഡക്ഷൻ ഹൗസാണ് ചിത്രം നിർമ്മിക്കുന്നത്. ജൂനിയർ എൻടിആറിനൊപ്പം ദേവര എന്ന ചിത്രത്തിലാണ് നിലവിൽ ജാൻവി അഭിനയിച്ചുകൊണ്ടിരിക്കുന്നത്. ബിഗ് ബജറ്റിൽ ഒരുങ്ങുന്ന ചിത്രം ഈ വർഷം തന്നെ തിയേറ്ററുകളിലെത്തും. വരുൺ ധവാനൊപ്പമുള്ള ബവൽ ആണ് മറ്റൊരു ചിത്രം.
