തെന്നിന്ത്യൻ സിനിമാ ലോകത്തെ പ്രിയനായികയാണ് സായ്പല്ലവി. പ്രേമം എന്ന ചിത്രത്തിലൂടെ ശ്രദ്ധേയയായ താരം ഇതിനോടകം മിക്ക തെന്നിന്ത്യൻ ഭാഷകളിലും സാന്നിദ്ധ്യം അറിയിച്ചുകഴിഞ്ഞു. ബോളിവുഡിലേക്കും ചുവടുവെക്കാനൊരുങ്ങുകയാണ് താരം. തെന്നിന്ത്യൻ സിനിമാ ലോകത്തെ സൂപ്പർതാരങ്ങളുടെ നായികയാകാൻ അവസരം ലഭിച്ചിട്ടും നടി ഒഴിവാക്കിയ കുറച്ച് ചിത്രങ്ങൾ നോക്കാം…
കാട്ര് വെളിയിടൈ ആണ് സായ് പല്ലവി നോ പറഞ്ഞ ചിത്രം. മണിരത്നം സംവിധാനം ചെയ്ത ചിത്രത്തിൽ കാർത്തിയായിരുന്നു നായക വേഷത്തിൽ എത്തിയത്. നായികാ പ്രാധാന്യമുളള ചിത്രമായിരുന്നിട്ടും പല്ലവി ആ ചിത്രം ഒഴിവാക്കുകയായിരുന്നു. തിരക്കഥ തനിക്ക് തൃപ്തികരമല്ലെന്ന് പറഞ്ഞാണ് ചിത്രത്തിൽ നിന്ന് നടി പിൻമാറിയത്. അദിതി റാവു ഹൈദരാലിയാണ് ചിത്രത്തിൽ നായികയായി അഭിനയിച്ചത്.
അജിത് നായകനായ വലിമൈ ആണ് ഇക്കൂട്ടത്തിൽ മറ്റൊരു ചിത്രം. 2022 ൽ പുറത്തിറങ്ങിയ ചിത്രത്തിൽ ആദ്യം നായികയായി തീരുമാനിച്ചിരുന്നത് സായ് പല്ലവിയെ ആയിരുന്നു. എന്നാൽ തന്റെ കഥാപാത്രത്തിന് വേണ്ടത്ര സ്വീകാര്യത ഇല്ലെന്ന് പറഞ്ഞ് താരം പിന്മാറുകയായിരുന്നു.
വിജയ് നായകനായ രണ്ടു ചിത്രങ്ങളാണ് സായ് പല്ലവി നിരസിച്ചത്. 2023 ൽ പുറത്തിറങ്ങിയ വാരിസും ലിയോയുമാണ് താരം വേണ്ടെന്ന് വച്ച ചിത്രങ്ങൾ. വാരിസിന്റെ കഥ കേട്ടതിന് ശേഷം അതൃപ്തി അറിയിച്ച് നടി പിന്മാറുകയായിരുന്നു. ലോകേഷ് കനകരാജ് സംവിധാനം ചെയ്ത ലിയോയിലും നായികയായി ക്ഷണം ലഭിച്ചിരുന്നെങ്കിലും കഥാപാത്രത്തിന് താൻ അനുയോജ്യ അല്ലെന്ന് അറിയിച്ചാണ് പല്ലവി പിന്മാറിയത്.
ചിരഞ്ജീവി നായകനായ തെലുങ്ക് ചിത്രം ഭോല ശങ്കർ ആണ് പല്ലവി വേണ്ടെന്ന് വച്ച മറ്റൊരു ചിത്രം. അജിത് നായകനായ തമിഴ് ചിത്രം വേതാളത്തിന്റെ റിമേക്ക് ആയിരുന്നു ഭോല ശങ്കർ. ചിത്രത്തിൽ ചിരഞ്ജിവിയുടെ നായികയായാണ് പല്ലവിയ്ക്ക് ക്ഷണം ലഭിച്ചത് എന്നാൽ റീമേക്ക് ചിത്രങ്ങളിൽ അഭിനയിക്കാൻ താൽപര്യമില്ലെന്നായിരുന്നു താരത്തിന്റെ മറുപടി.
