മാമ്പഴക്കാലത്തിലേക്ക് കടക്കുകയാണ് നാം. നമ്മെയൊക്കെ കുട്ടിക്കാലത്തേക്ക് കൂട്ടിക്കൊണ്ടു പോകുന്ന സമയമാണിത്. വേനൽക്കാലത്ത് എല്ലാവർക്കും ഏറെ പ്രിയങ്കരമായ പഴവർഗ്ഗം കൂടിയാണ് മാമ്പഴം. നല്ല പഴുത്ത മാങ്ങ കിട്ടിയാൽ ജ്യൂസ് അടിച്ച് കുടിക്കുന്നതും പതിവാണ്. ഇനി അൽപം വെറൈറ്റി വേണമെങ്കിലോ?
സാധാരണയായി മാമ്പഴ ജ്യൂസിൽ ഉപയോഗിക്കുന്ന ചേരുവകൾ നമുക്കറിയാം. എന്നാൽ ഇതിൽ നിന്ന് വ്യത്യസ്തമായി ചൗവ്വരി കൂടി ചേർത്താണ് ഈ ജ്യൂസ് തയ്യാറാക്കേണ്ടത്.
തയ്യാറാക്കേണ്ട വിധം
മാങ്ങ കഷ്ണങ്ങളാക്കി മാറ്റുക. ഇതിൽ കുറച്ച് കഷ്ണങ്ങൾ മാറ്റിവച്ച് ബാക്കിയുള്ളതെല്ലാം പഞ്ചസാര ചേർത്ത് മിക്സിയിൽ അടിച്ചെടുക്കുക. ശേഷം ഈ മാങ്ങാപൾപ്പ് ഫ്രിഡ്ജിൽ വയ്ക്കാം. പൾപ്പ് നല്ലപോലെ തണുത്താൽ ഫ്രിഡ്ജിൽ നിന്ന് പുറത്തെടുത്ത് അതിന് മുകളിലേക്ക്
പൊടിച്ചെടുത്ത ഐസ് ക്യൂബുകൾ ചേർക്കുക. അതിലേക്ക് നേരത്തെ മാറ്റിവച്ച കഷ്ണങ്ങളാക്കിയ മാങ്ങകൂടി ഇട്ട് ഇളക്കി ചേർക്കുക. ഇതിലേക്ക് അൽപം കുതിർത്ത ചൗവ്വരി ഇടുക. അതിന് ശേഷം ഒരു ഗ്ലാസ് പാൽ ചേർത്ത് ഇളക്കിയെടുക്കുക. ഇതോടെ സ്വാദിഷ്ടമായ കൊറിയൻ മാംഗോ ജ്യൂസ് തയ്യാർ.
ഫൈബറിന്റെയും വിറ്റാമിന്റെയും ഉറവിടമാണ് മാങ്ങ. ഇതിൽ ആവശ്യത്തിന് മധുരം അടങ്ങിയിട്ടുള്ളതിനാൽ പഞ്ചസാര കുറച്ച് മാത്രമേ ചേർക്കേണ്ടതുള്ളൂ.
