ചെന്നൈ: ശരത് കുമാറിന്റെ പാർട്ടിയായ അഖിലേന്ത്യ സമത്വമക്കൾ കക്ഷി ബിജെപിയിൽ ലയിച്ചതിൽ ആശംസകൾ അറിയിച്ച് തമിഴ്നാട് ബിജെപി അദ്ധ്യക്ഷൻ അണ്ണാമലൈ. എക്സിലൂടെയാണ് അണ്ണാമലൈ ആശംസകൾ അറിയിച്ചത്. ശരത് കുമാറിനെ ബിജെപിയിലേക്ക് സ്വാഗതം ചെയ്യുന്നതിന്റെ ചിത്രങ്ങളും അണ്ണാമലൈ എക്സിൽ പങ്കുവച്ചു.
‘പ്രധാനമന്ത്രി നരേന്ദ്രമോദിയുടെ കരുത്തുറ്റ നേതൃത്വത്തിൽ പ്രചോദനം ഉൾക്കൊണ്ടും തമിഴ് മണ്ണിലേക്ക് ദേശീയത ഉയർത്തി പിടിക്കാനുമാണ് ശരത് കുമാറും അദ്ദേഹത്തിന്റെ പാർട്ടിയും ബിജെപിയിൽ എത്തിയിരിക്കുന്നത്. മുതിർന്ന നേതാക്കളുടെ സാന്നിധ്യത്തിൽ അവർ ഔദ്യോഗികമായി ബിജെപിയിലേക്ക് ചേർന്നു. തമിഴ്നാട്ടിൽ മാറ്റങ്ങൾ വേണമെന്ന് ജനങ്ങൾ ആഗ്രഹിക്കുന്ന സമയത്താണ് ശരത് കുമാറിന്റെ പാർട്ടി പ്രധാനമന്ത്രിക്കൊപ്പം ചേർന്നത്. ഞങ്ങളുടെ കുടുംബത്തിലേക്ക് ഹാർദ്ദവമായ സ്വാഗതം’ – അണ്ണാമലൈ എക്സിൽ കുറിച്ചു.
ശരത് കുമാറും അഖിലേന്ത്യ സമത്വമക്കൾ കക്ഷിയും ബിജെപിയിൽ ചേരുമെന്ന തരത്തിൽ വാർത്തകൾ നേരത്തെ
പുറത്തു വന്നിരുന്നെങ്കിലും ഇതുമായി ബന്ധപ്പെട്ട സ്ഥിരീകരണങ്ങൾ ഉണ്ടായിരുന്നില്ല. ഇതിന് പിന്നാലെയാണ് ബിജെപിയിൽ ലയിക്കുന്നുവെന്ന് ശരത് കുമാറിന്റെ പാർട്ടി ഔദ്യോഗികമായി പ്രഖ്യാപിച്ചത്. അണ്ണാമലൈ, ബിജെപി ദേശീയ സെക്രട്ടറി അരവിന്ദ് മേനോൻ തുടങ്ങിയ മുതിർന്ന നേതാക്കളുടെ സാന്നിധ്യത്തിലായിരുന്നു ശരത് കുമാറിന്റെ പാർട്ടി ബിജെപിയിലേക്ക് ലയിച്ചത്.