മുംബൈ: പേടിഎമ്മിന്റെയും ഫോൺപേയുടെയും കുത്തകയായിരുന്ന സൗണ്ട്ബോക്സ് സെഗ്മെന്റിലേക്ക് പ്രവേശിക്കാനൊരുങ്ങി ജിയോ പേയ്‌മെന്റ്. ഇതിന്റെ ഭാഗമായി റീട്ടെയിൽ ഔട്ട്ലെറ്റുകളിലെ പേയ്മെന്റുകളിൽ വിപ്ലവം സൃഷ്ടിക്കാനായി ജിയോ സൗണ്ട്ബോക്സ് (Jio soundbox) അവതരിപ്പിക്കാനാണ് കമ്പനി തയ്യാറെടുത്തിരിക്കുന്നത്. ഗൂഗിൾ പേ, ഫോൺ പേ പോലെ ‘ജിയോ പേ’ സേവനവും ഇതിനോടൊപ്പം വിപുലീകരിക്കും.
ജിയോ സൗണ്ട് ബോക്‌സിൽ പരീക്ഷണം നടത്തിവരികയായിരുന്നു റിലയൻസ്. റിലയൻസ് റീട്ടെയിൽ സ്റ്റോറുകളിൽ കഴിഞ്ഞ ഒമ്പത് മാസത്തോളമായി സൗണ്ട്ബോക്സ് പരീക്ഷണ അടിസ്ഥാനത്തിൽ വിന്യസിച്ചിരുന്നു. ജയ്പൂർ, ഇൻഡോർ, ലക്നൗ തുടങ്ങിയ ചെറിയ മെട്രോ സ്റ്റേഷനുകളിലും റിലയൻസ് ഗ്രൂപ്പിന്റെ റീട്ടെയിൽ സ്ഥാപനങ്ങളിലുമാണ് ഉപകരണം പരീക്ഷിച്ചത്. വൈകാതെ രാജ്യത്തുടനീളം സേവനം അവതരിപ്പിക്കാനാണ് റിലയൻസ് ലക്ഷ്യമിടുന്നത്.
രാജ്യത്ത് രണ്ട് ദശലക്ഷത്തിലേറെ വ്യാപാരികളാണ് സൗണ്ട് ബോക്‌സുകൾ അവരുടെ സ്ഥാപനങ്ങളിൽ വിന്യസിച്ചിട്ടുള്ളത്. അതിൽ കൂടുതലും പേടിഎമ്മിന്റേതാണ്. ഫോൺ പേയാണ് രണ്ടാമത്. പേടിഎം പേയ്‌മെന്റ്‌സ് ബാങ്കിന്റെ തകർച്ച പേടിഎമ്മിനും വലിയ തിരിച്ചടിയായിരിക്കുകയാണ്. ഇത് ജിയോ പേയ്‌ക്ക് ഗുണം ചെയ്യുമെന്നാണ് വിലയിരുത്തപ്പെടുന്നത്.
