തമിഴ് സിനിമയെ സംബന്ധിച്ചിടത്തോളം ആകർഷകമായ നിരവധി നടിമാർ വന്നു പോകുമെങ്കിലും ആരാധകരുടെ മനസിൽ അവശേഷിക്കുന്നത് ചുരുക്കം ചിലർ മാത്രമാണ് .അത്തരത്തിലൊരു നടിയാണ് മുംതാജ്. 1999-ൽ ഡി രാജേന്ദർ സംവിധാനം ചെയ്ത “മോനിഷ എൻ മോണോലിസ” എന്ന ചിത്രത്തിലൂടെ നായികയായി തമിഴ് സിനിമയിൽ അരങ്ങേറ്റം കുറിച്ചു. ആദ്യ ചിത്രം തന്നെ താരത്തിന് ആരാധകർക്കിടയിൽ നല്ല പേര് നേടിക്കൊടുത്തു. അതിനുശേഷം എസ് ജെ സൂര്യ സംവിധാനം ചെയ്ത വിജയ് ചിത്രമായ ഖുഷിയിൽ അഭിനയിച്ചു. ഈ വേഷം ഏറെ ശ്രദ്ധിക്കപ്പെട്ടു.
എന്നാൽ മുൻനിര താരങ്ങളുടെ സിനിമകളിൽ പിന്നീട് അഭിനയിക്കാൻ ഇവർക്ക് അവസരം ലഭിച്ചില്ല. ഇതിനു ശേഷം താരം അഭിനയം നിർത്തി. ഇതുമായി ബന്ധപ്പെട്ട് അടുത്തിടെ ഒരു അഭിമുഖത്തിൽ മുംതാജ് അഭിനയം നിർത്തിയതിനെ പറ്റി പ്രതികരിച്ചിരുന്നു . ‘ ഞാൻ ഒരു മുസ്ലീം കുടുംബത്തിലാണ് ജനിച്ചത് . എനിക്ക് ഖുറാൻ നന്നായി അറിയാം. ചില കാര്യങ്ങൾ ചെയ്യാനും , ചെയ്യാതിരിക്കാനും അള്ളാഹു എന്നോട് കൽപിച്ചിട്ടുണ്ട്.
തുടക്കത്തിൽ ഖുറാനിൽ പറഞ്ഞതിന്റെ അർത്ഥം എനിക്കറിയില്ലായിരുന്നു. പക്ഷേ, ഏതോ ഒരു ഘട്ടത്തിൽ അത് എന്നിൽ പുലരാൻ തുടങ്ങി, ക്രമേണ എന്നിൽ ഒരു മാറ്റം വന്നു. അതുകൊണ്ടാണ് സിനിമയിൽ ചില കാര്യങ്ങൾ ചെയ്യുന്നത് ഒഴിവാക്കിയത്. പിന്നെ ഞാൻ സിനിമ ഉപേക്ഷിക്കാൻ കാരണം അള്ളാഹു ആണ്.
അള്ളാഹു എന്നെ മാറ്റി. ഒരു ദിവസം ഞാൻ വീട്ടിൽ ഇരിക്കുമ്പോൾ തലയിൽ ദാവണി ശരിയാക്കി വെച്ചു. തല മറയ്ക്കാതെ പുറത്ത് പോകുമ്പോൾ നഗ്നയായി തോന്നി. പുറത്തിറങ്ങുമ്പോൾ മാന്യമായ വസ്ത്രം ധരിച്ചു . അള്ളാഹുവിന് വേണ്ടിയാണ് ഹിജാബ് ധരിക്കുന്നത് . സിനിമയിൽ സ്വിമ്മിംഗ് സ്യൂട്ടിൽ അഭിനയിച്ച ഒരാൾ അത്തരമൊരു വസ്ത്രം ധരിക്കുന്നു! ആശ്ചര്യമായിരിക്കും. പക്ഷേ, എന്നിൽ ഒരുപാട് മാറ്റങ്ങൾ വന്നു. – മുംതാജ് പറഞ്ഞു.
