ന്യൂഡൽഹി: ലോക്സഭാ തിരഞ്ഞെടുപ്പിനുള്ള രണ്ടാം ഘട്ട സ്ഥാനാർത്ഥി പട്ടിക പുറത്തുവിട്ട് ബിജെപി. 72 പേരുടെ പട്ടികയാണ് പുറത്തുവന്നിരിക്കുന്നത്. ഡൽഹി, ഗുജറാത്ത്, ഹരിയാന, ഹിമാചൽ പ്രദേശ്, കർണാടക, മദ്ധ്യപ്രദേശ്, മഹാരാഷ്ട്ര, തെലങ്കാന, ത്രിപുര എന്നീ സംസ്ഥാനങ്ങളിൽ നിന്നുള്ള സ്ഥാനാർത്ഥികളെയാണ് പ്രഖ്യാപിച്ചിരിക്കുന്നത്. ബിജെപി ആദ്യഘട്ട പട്ടിക പുറത്തുവിട്ടത് ഈ മാസം ആദ്യമാണ്. 190 സ്ഥാനാർത്ഥികളായിരുന്നു അദ്യ പട്ടികയിലുണ്ടായിരുന്നത്.
കേന്ദ്രമന്ത്രിമാരായ പിയൂഷ് ഗോയൽ, നിതിൻ ഗഡ്കരി, അനുരാഗ് ഠാക്കൂർ, ശോഭാ കരന്ദലാജെ, പ്രള്ഹാദ് ജോഷി എന്നിവർക്ക് പുറമേ ഹരിയാന മുൻ മുഖ്യമന്ത്രി മനോഹർ ലാൽ ഖട്ടർ, കർണാചക മുൻ മുഖ്യമന്ത്രി ബസവരാജ ബൊമ്മൈ, യുവമോർച്ച ദേശീയ അദ്ധ്യക്ഷൻ തേജസ്വി സൂര്യ എന്നിവരും പട്ടികയിൽ ഇടം പിടിച്ചു.
മുംബൈ നോർത്തിൽ നിന്നാണ് പിയൂഷ് ഗോയൽ മത്സരിക്കുന്നത്. നിതിൻ ഗഡ്കരി- നാഗ്പൂർ, അനുരാഗ് ഠാക്കൂർ- ഹമീർപൂർ, പ്രള്ഹാദ് ജോഷി- ധാർവാട്, ശോഭാ കരന്തലജെ- ബെംഗളൂരു നോർത്ത്, തേജസ്വി സൂര്യ- ബെംഗളൂരു സൗത്ത്, ബി. ശ്രീരാമലു- ബെല്ലാരി, ബസവരാജ ബൊമ്മൈ- ഹവേരി, മനോഹർ ലാൽ ഖട്ടർ- കർനാൽ എന്നിങ്ങനെയാണ് പ്രഖ്യാപനം.
