ശരീരത്തിലേക്കാവശ്യമായ പോഷകഘടങ്ങളിൽ പ്രധാനമാണ് വിറ്റാമിൻ ഡി. പ്രതിരോധശേഷി വർദ്ധിപ്പിക്കുന്നതിനും എല്ലുകൾക്കും പല്ലുകൾക്കും ബലം നൽകുന്നതിനും വിറ്റാമിൻ ഡി അത്യാവശ്യമാണ്. എന്നാൽ അമിതമായാൽ അമൃതും വിഷം എന്നാണല്ലോ പറയാറുള്ളത്. അത്തരത്തിൽ വിറ്റാമിൻ ഡിയുടെ അമിത ഉപയോഗം മൂലം ഒരാൾ മരണപ്പെട്ട വാർത്തയാണ് പുറത്തുവരുന്നത്.
യുകെ സ്വദേശിയും 89കാരനുമായ ഡേവിഡ് മിച്‌നറാണ് മരിച്ചത്. വിറ്റാമിൻ ഡിയുടെ അമിത ഉപയോഗം ഹൈപ്പർകാൽസീമിയ എന്ന രോഗത്തിലേക്ക് എത്തിക്കുകയായിരുന്നു. സൂര്യപ്രകാശത്തിലൂടെയാണ് വിറ്റാമിൻ ഡി ശരീരത്തിൽ എത്തുന്നതെങ്കിലും ഇവയുടെ സപ്ലിമെന്റുകൾ വിപണിയിൽ സുലഭമായി ലഭിക്കും. 9 മാസത്തോളം ഇത്തരം സപ്ലിമെന്റുകൾ മിച്‌നർ കഴിച്ചിരുന്നു.
കാൽസ്യം, മഗ്നീഷ്യം, ഫോസ്‌ഫേറ്റ് തുടങ്ങിയ ഘടകങ്ങളുടെ ആഗിരണത്തിന് വിറ്റാമിൻ ഡി ആവശ്യമാണ്. എന്നാൽ വിറ്റാമിൻ ഡിയുടെ സപ്ലിമെന്റുകൾ കൂടുതലായി കഴിക്കുമ്പോൾ രക്തത്തിൽ കാത്സ്യത്തിന്റെ അളവ് കൂടി ഹൈപ്പർകാൽസീമിയ എന്ന രോഗത്തിലേക്ക് വഴിവയ്‌ക്കുന്നു. ഈ രോഗം ബാധിച്ച ഒരാളിൽ ക്ഷീണം, ഛർദ്ദി, ശ്വാസകോശ രോഗങ്ങൾ, വൃക്കകളിലെ കല്ലുകൾ തുടങ്ങിയവ കാണപ്പെടുന്നു. രോഗം വൃക്കകളെ ബാധിച്ചാൽ മരണം വരെ സംഭവിക്കാം.
