മലയാളികൾക്കെന്നും പ്രിയങ്കരമാണ് പൊതിച്ചോറ്. നല്ല തൂശനില വെട്ടി, ചെറുതീയിൽ വാട്ടി കുത്തരി ചോറും ചമ്മന്തിയും തോരനും മുട്ട പൊരിച്ചതുമൊക്കെയുള്ള പൊതിച്ചോറിന് ആരാധകർ ഏറെയാണ്. ഉച്ചയ്ക്ക് കഴിക്കാനായി പൊതി തുറക്കുമ്പോൾ വരുന്ന മണത്തിൽ തന്നെ കൊതിയൂറും. ദീർഘ ദൂരയാത്രകളിൽ പോലും കൈകളിൽ പൊതിച്ചോറുണ്ടാകും. ഇന്ന് സ്ഥിതി മാറി. വിപണികളിൽ പലരീതിയിലുള്ള പൊതിച്ചോറ് ലഭ്യമാണെങ്കിലും ഇത് പ്ലാസ്റ്റികിൽ പൊതിഞ്ഞാണ് നൽകുന്നത്. ആരോഗ്യത്തിന് ഗുണത്തേക്കാൾ ഏറെ ദോഷമാണിത്.
വാഴയിലയിൽ പൊതിഞ്ഞ പൊതിച്ചോറിന്റെ ഗുണങ്ങൾ എന്തൊക്കെയെന്ന് നോക്കാം
*വാഴ ഇലയിലെ മെഴുക് പോലുള്ള ആവരണമാണ് പൊതിച്ചോറിന് പ്രത്യേക രുചിയും മണവും നൽകുന്നത്.
*പ്രോട്ടീനുകൾ, വൈറ്റമിൻ എ, കാത്സ്യം, കരോട്ടിൻ, സിട്രിക് ആസിഡ് പോലുള്ള ശരീരത്തിന് ഗുണകരമായ നിരവധി സംയുക്തങ്ങൾ പൊതിച്ചോറിൽ അടങ്ങിയിട്ടുണ്ട്.
*വാഴയിലയിലെ ആന്റി ഓക്സിഡന്റുകൾ കാൻസറിനെ പ്രതിരോധിക്കാൻ സഹായിക്കുന്നു.
*ഫംഗസ്, ബാക്ടീരിയ, വൈറസ് തുടങ്ങി എല്ലാത്തരം രോഗാണുക്കളെയും ചെറുത്തു തോൽപ്പിക്കാനുള്ള കഴിവും വാഴയിലയ്ക്കുണ്ട്.
*ഇലയിലെ ക്ലോറോഫിൽ കുടലിനുള്ളിലെ അൾസർ, ചർമസംബന്ധമായ രോഗങ്ങൾ എന്നിവയെ തടയാനും ഗുണകരമാണ്.
*രക്തം ശുദ്ധീകരിക്കാനും മൂത്രസംബന്ധമായ രോഗങ്ങളെ പ്രതിരോധിക്കാനും വാഴയിലയിലെ ഘടകങ്ങൾക്ക് സാധിക്കും.
പൊതിച്ചോറ് ഉണ്ടാകുന്ന വിധം
വാഴയില തീയിൽ വാട്ടി ചോറ് വിളമ്പുക. അതിന് മുകളിലായി തോരൻ, മെഴുക്പുരട്ടി, ചമ്മന്തി, അച്ചാർ, മുട്ട പൊരിച്ചത് പോലുള്ള ഡ്രൈ ആയിട്ടുള്ള കറികൾ വിളമ്പുക. ഇല വാഴയുടെ നാരു കൊണ്ടോ ഒരു നൂല് കൊണ്ടോ കെട്ടിവയ്ക്കുക. ചാറു കറികൾ മറ്റൊരു പാത്രത്തിലെടുക്കാം.