ഈ വർഷം ഒരുപിടി ചിത്രങ്ങളാണ് ധനുഷിന്റേതായി ഒരുങ്ങുന്നത്. ധനുഷ് സംവിധാനം ചെയ്ത് നായകനാകുന്ന റയാൻ, ശേഖർ കമ്മൂല ചിത്രം കുബേര എന്നിവയാണ് ധനുഷിന്റേതായി അണിയറയിൽ ഒരുങ്ങുന്ന ചിത്രങ്ങൾ. ഇപ്പോഴിതാ അക്കൂട്ടത്തിലേയ്ക്ക് ഒരു പുതിയ ചിത്രത്തിന്റെ പ്രഖ്യാപനം കൂടി നടന്നിരിക്കുകയാണ്.
രാജ്കുമാർ പെരിയസാമി സംവിധാനം ചെയ്യുന്ന ചിത്രത്തിലായിരിക്കും അടുത്തതായി ധനുഷ് അഭിനയിക്കുന്നത്. ഇക്കാര്യത്തിൽ ഔദ്യോഗിക പ്രഖ്യാപനമൊന്നും നടന്നിട്ടില്ല. എന്നാൽ പുതിയ ചിത്രത്തെ സംബന്ധിച്ച് ഇരുവരും ചർച്ച നടത്തിയതായും വിവരങ്ങളുണ്ട്. എന്തായാലും ഈ വാർത്ത ആരാധകരിൽ വലിയ ആവേശം ഉണ്ടായിരിക്കുന്നത്.
ശിവകാർത്തികേയനെ നായകനാക്കി സംവിധാനം ചെയ്യുന്ന അമരൻ എന്ന ചിത്രത്തിന്റെ തിരക്കിലാണ് രാജ്കുമാർ പെരിയസാമി. ചിത്രത്തിന്റെ രണ്ടാം ഷെഡ്യൂൾ കഴിഞ്ഞ ദിവസമാണ് ആരംഭിച്ചത്. അതേസമയം ധനുഷ് സംവിധാനം ചെയ്യുന്ന റയാൻ ചിത്രീകരണം പൂർത്തിയായി എന്ന തരത്തിലുള്ള വാർത്തകൾ അടുത്തിടെ പുറത്തുവന്നിരുന്നു. ചിത്രത്തിൽ കാളിദാസ് ജയറാമും കേന്ദ്രകഥാപാത്രമാകുന്നുണ്ട്.
ബിഗ് ബജറ്റിൽ ഒരുങ്ങുന്ന മറ്റൊരു ചിത്രമാണ് കുബേര. ചിത്രത്തിൽ വളരെ വ്യത്യസ്തമായ ലുക്കിലാണ് താരം എത്തുന്നത്. തെലുങ്ക് സൂപ്പർസ്റ്റാർ നാഗാർജ്ജുനയും ചിത്രത്തിൽ പ്രധാനവേഷത്തിൽ എത്തുന്നുണ്ട്. രശ്മിക മന്ദാനയാണ് കുബേരയിലെ നായിക.
