സൂപ്പർ ഹിറ്റ് തെലുങ്ക് ചിത്രം കാർത്തികേയയുടെ മൂന്നാം ഭാഗം ഒരുങ്ങുന്നു. നിഖിൽ നായകനാകുന്ന ചിത്രത്തിന്റെ പ്രഖ്യാപനം കഴിഞ്ഞ ദിവസം നടന്നു. നിഖിൽ തന്നെയാണ് സമൂഹമാദ്ധ്യമങ്ങളിലൂടെ കാർത്തികേയ 3 യുടെ ഔദ്യോഗിക പ്രഖ്യാപനം നടത്തിയത്. കഴിഞ്ഞ വർഷം റിലീസ് ചെയ്ത കാർത്തികേയ 2 മികച്ച വിജയം നേടിയിരുന്നു. ഹിന്ദി പതിപ്പും ശ്രദ്ധനേടിയിരുന്നു.
‘പുതിയ സാഹസിക കഥകളുടെ അന്വേഷണത്തിലാണ് ഡോ. കാർത്തികേയ.’ എന്ന കുറിപ്പോടെയായിരുന്നു മൂന്നാം ഭാഗത്തിന്റെ വിവരങ്ങൾ നിഖിൽ പങ്കുവച്ചത്. ചിത്രത്തിന്റെ തിരക്കഥാ രചന പുരോഗമിക്കുകയാണ്. വലിയ ക്യാൻവാസിൽ ഒരുങ്ങുന്ന ചിത്രം സംവിധാനം ചെയ്യുന്നത് ചന്തു മൊണ്ടേറ്റിയാണ്. ത്രില്ലർ ജോണറിൽ ഒരുങ്ങുന്ന സിനിമയുടെ ചിത്രീകരണം ഉടൻ ആരംഭിക്കും.
കാർത്തികേയ 2ൽ മലയാളിതാരം അനുപമ പരമേശ്വരനായിരുന്നു നായിക. ചിത്രത്തിൽ അനുപം ഖേറും സുപ്രധാന വേഷം കൈകാര്യം ചെയ്തിരുന്നു. തെലുങ്കിനൊപ്പം മലയാളം, തമിഴ്, കന്നഡ, ഹിന്ദി ഭാഷകളിലായിരുന്നു ചിത്രം പ്രദർശനത്തിനെത്തിയത്. മലയാളത്തിലും ചിത്രം ശ്രദ്ധ നേടിയിരുന്നു.