പുതിയ സിനിമയുടെ ചിത്രീകരണത്തിനായി നടൻ വിജയ് തിരുവനന്തപുരത്തെത്തി. ഇന്ന് വൈകിട്ട് അഞ്ച് മണിക്കാണ് വിജയ് തിരുവനന്തപുരം വിമാനത്താവളത്തിലെത്തിയത്. നടനെ സ്വീകരിക്കാനായി നിരവധി ആരാധകരാണ് ഉച്ച മുതൽ വിമാനത്താവളത്തിന്റെ ആഭ്യന്തര ടെർമിനലിൽ തടിച്ചു കൂടിയത്.
ആരാധകരെ നിയന്ത്രിക്കാൻ പോലീസ് സംഘം ഏറെ പ്രയാസപ്പെട്ടു. ഇതിനെ തുടര്ന്ന് എയര്പോര്ട്ട് റോഡില് വന് ഗതാഗത കുരുക്കും രൂപപ്പെട്ടു. ബാനറുകളും ഫ്ലെക്സ് ബോർഡുകളുമായാണ് ആളുകളെത്തിയത്. ചെന്നൈയില്നിന്ന് പുറപ്പെട്ട ചാര്ട്ടേര്ഡ് വിമാനം വൈകിട്ട് അഞ്ചിനാണ് തിരുവനന്തപുരത്ത് എത്തിയത്. താരം സഞ്ചരിച്ച വാഹനത്തെ പൊതിഞ്ഞു കൊണ്ടായിരുന്നു ആരാധകർ ആവേശം പ്രകടിപ്പിച്ചത്.
വെങ്കട് പ്രഭു സംവിധാനം ചെയ്യുന്ന ദി ഗോട്ടിന്റെ ചിത്രീകരണത്തിനായാണ് താരം തലസ്ഥാനത്ത് എത്തിയത്. തിരുവനന്തപുരം വിമാനത്താവളത്തിലും ഗ്രീൻ ഫീൽഡ് സ്റ്റേഡിയത്തിലുമാണ് ഗോട്ടിന്റെ ചിത്രീകരണം നടക്കുന്നത്. വിവിധ രാജ്യങ്ങളിലായാണ് ഗോട്ടിന്റെ ചിത്രീകരണം നടന്നത്. ഇതിന് മുൻപ് മോസ്കോയിൽ വെച്ചായിരുന്നു ചിത്രീകരണം നടന്നത്.
14 വര്ഷങ്ങള്ക്ക് ശേഷമാണ് വിജയ് കേരളത്തിലെത്തുന്നത്. മാര്ച്ച് 23 വരെ വിജയ് തിരുവനന്തപുരത്തുണ്ടാവും. സംവിധായകന് വെങ്കട്ട് പ്രഭു രണ്ടാഴ്ച മുൻപേ തലസ്ഥാനത്തെത്തി ലൊക്കേഷന് പരിശോധിച്ചിരുന്നു.
