തെന്നിന്ത്യൻ സിനിമാ ലോകത്ത് വൻ ചർച്ചയായി മാറിയിരിക്കുകയാണ് മഞ്ഞുമ്മൽ ബോയ്സ്. ചിദംബരത്തിന്റെ സംവിധാനത്തിലെത്തിയ ചിത്രം 200 കോടി ക്ലബിൽ ഇടം നേടിയിരിക്കുകയാണ്. തമിഴ്നാട്ടിൽ നിന്നുമാത്രം ചിത്രം 50 കോടി കളക്ഷനാണ് നേടിയത്.
ഫെബ്രുവരി 22-ന് തിയേറ്ററിലെത്തിയ ചിത്രം ഇപ്പോഴും ഹൗസ് ഫുൾ ഷോയുമായാണ് മുന്നേറുന്നത്. ആദ്യ ഷോകൾക്ക് ശേഷം ലഭിച്ച മൗത്ത് പബ്ലിസിറ്റിയാണ് സിനിമയുടെ വിജയത്തിൽ നിർണായകമായത്. മലയാള സിനിമയുടെ കളക്ഷൻ റെക്കോഡുകൾ മഞ്ഞുമ്മൽ ബോയ്സ് തിരുത്തിക്കുറിക്കുമെന്നാണ് സിനിമാമേഖലയിലെ സംസാരം.
കൊച്ചിയിൽ നിന്നും കൊടൈക്കനാലിലേക്ക് യാത്ര പോകുന്ന 11 സുഹൃത്തുക്കളുടെ ജീവിതത്തിൽ സംഭവിക്കുന്ന അപ്രതീക്ഷിതമായ സംഭവങ്ങളാണ് മഞ്ഞുമ്മൽ ബോയ്സ്. സൗബിന് ഷാഹിര്, ശ്രീനാഥ് ഭാസി, ബാലു വര്ഗീസ്, ഗണപതി, ലാല് ജൂനിയര്, ചന്തു സലീംകുമാര്, അഭിറാം രാധാകൃഷ്ണന്, ദീപക് പറമ്പോല്, ഖാലിദ് റഹ്മാന്, അരുണ് കുര്യന്, വിഷ്ണു രഘു എന്നിവരാണ് ചിത്രത്തിലെ പ്രധാന താരങ്ങൾ. പറവ ഫിലിംസിന്റെ ബാനറിൽ സൗബിന് ഷാഹിര്, ബാബു ഷാഹിർ, ഷോൺ ആന്റണി എന്നിവർ ചേർന്നാണ് ചിത്രത്തിന്റെ നിർമ്മാണം.
