ഇന്ത്യയിലെ അറിയപ്പെടുന്ന ക്രിക്കറ്റ് താരങ്ങളിൽ ഒരാളാണ് സഞ്ജു സാംസൺ. ഐപിഎല്ലിൽ രാജസ്ഥാൻ റോയൽസിനായി മികച്ച പ്രകടനം പുറത്തെടുക്കുന്ന താരത്തിന് ഇന്ത്യൻ ടീമിൽ സ്ഥിരസാന്നിധ്യമാകാൻ ഇതുവരെയും സാധിച്ചിട്ടില്ല. ടി20 ലോകകപ്പിനുള്ള ടീമിൽ ഇടംപിടിക്കണമെങ്കിൽ ഐപിഎല്ലിൽ മികച്ച പ്രകടനം കാഴ്ചവയ്ക്കണം. ഇപ്പോൾ ഇന്ത്യൻ ടീമിലേക്കുള്ള യാത്രയെ കുറിച്ച് സംസാരിക്കുകയാണ് സഞ്ജു.
ലോകത്തിലെ ഏറ്റവും മികച്ച ടീമായ ഇന്ത്യക്ക് വേണ്ടിയാണ് ഞാൻ ക്രിക്കറ്റ് കളിക്കുന്നത്. ക്രിക്കറ്റിൽ ഇന്ത്യയാണ് നമ്പർ വൺ. പ്രതിഭ തെളിയിച്ച നിരവധി താരങ്ങളുള്ള നാടാണിത്. കേരളത്തിൽ നിന്നുള്ള ഒരു പയ്യന് ദേശീയ ടീമിൽ സ്ഥാനം ഉറപ്പിക്കണമെങ്കിൽ സവിശേഷമായ എന്തെങ്കിലും നേട്ടം കൈവരിച്ചിരിക്കണമെന്നും സഞ്ജു പറഞ്ഞു. സ്റ്റാർ സ്പോർട്സിന്റെ സ്റ്റാർ നഹി ഫാർ ഷോയിലായിരുന്നു പരാമർശം.
‘ബാറ്റിംഗിൽ എല്ലായ്പ്പോഴും വേറിട്ട് നിൽക്കാനാണ് ഞാൻ ആഗ്രഹിക്കുന്നത്. തന്റേതായ ശൈലിയിൽ ബാറ്റ് ചെയ്യാനാണ് ഞാൻ ആഗ്രഹിക്കുന്നത്. അതുകൊണ്ടാണ് ആദ്യ പന്തിൽ തന്നെ സിക്സ് അടിക്കാൻ ശ്രമിക്കുന്നത്. ഒരു സിക്സറിനായി എന്തിന് പത്തുപന്തുകൾ വരെ നേരിടണം. ആ ചിന്തയാണ് എന്റെ പവർ-ഹിറ്റിംഗിന് പിന്നിലെ പ്രചോദനം.’
കോവിഡിന്റെ സമയങ്ങളിൽ ഞാൻ വളരെയധികം പരിശ്രമിച്ചു. നിരവധിയാളുകൾ എന്നെ സഹായിച്ചു. ഞാൻ വളരെ സന്തോഷവാനാണ്, കാര്യങ്ങൾ മികച്ച രീതിയിൽ മുന്നോട്ട് പോകുന്നുണ്ട്. പക്ഷേ ഇതുവരെ നേടിയതിൽ ഞാൻ തൃപ്തനല്ല. എനിക്ക് ഇനിയും മുന്നോട്ട് പോകണം. ക്രിക്കറ്റിൽ എന്റെ പേര് അടയാളപ്പെടുത്തുന്ന രീതിയിൽ എന്തെങ്കിലും ദേശീയടീമിനായി ദേശീയടീമിനായി ചെയ്യണമെന്ന പ്രതീക്ഷയും സഞ്ജു സാംസൺ പങ്കുവച്ചു.
