മനുഷ്യരുടെ കഴിവുകളും സ്വഭാവവും അറിഞ്ഞ് സ്നേഹിക്കുകയും ബഹുമാനിക്കുകയും ചെയ്യാതെ വർണ വിവേചനം നടത്തുന്ന ഒരു സമൂഹം 21-ാം നൂറ്റാണ്ടിലും നിലനിൽക്കുന്നു എന്നത് അതിശയകരമാണ്. മുമ്പ് കറുത്ത നിറത്തെ ഭയക്കുന്ന ഒരു കൂട്ടരാണ് ഉണ്ടായിരുന്നതെങ്കിൽ ഇപ്പോൾ കറുത്ത നിറത്തോട് വിവേചനം കാണിക്കുന്നവരാണ്.
ഈ കൊച്ചു കേരളത്തിൽ കറുപ്പിനോട് വിവേചനം കാണിക്കുമ്പോൾ ലോകം കറുപ്പിനെ ആഘോഷമാക്കുകയാണ്. കറുപ്പിനെ മനോഹരമാക്കുന്ന നിരവധി സുന്ദരിമാരുണ്ട്. ദക്ഷിണ സുഡാനിലെ ന്യാകിം ഗേത്വെച്ചി എന്ന പെണ്‍കുട്ടിയാണ് മോഡലിംഗ് ലോകത്തേക്ക് അഴകു നിറഞ്ഞ തന്റെ സൗന്ദര്യത്തെ പ്രദർശിപ്പിച്ച് ലോക ശ്രദ്ധ പിടിച്ചു പറ്റിയത്. അന്ന് മുതൽ ലോകം ന്യാകിമിനെ ”കറുപ്പിന്റെ രാജ്ഞി’ എന്നാണ് വിളിക്കുന്നത്.
സൗന്ദര്യമെന്നത് വെളുപ്പ് നിറമാണെന്ന ചിന്തകളിൽ നിന്നും സമൂഹത്തെ പുറത്ത് കൊണ്ടുവരാനാണ് ന്യാകിം ശ്രമിച്ചത്. അതിൽ ന്യാക്യാം പൂർണമായും വിജയിച്ചു. ന്യാകിക്ക് പിന്നാലെ നിരവധി പേരാണ് കറുത്ത സൗന്ദര്യത്തെ പ്രദർശിപ്പിച്ച് മോഡലിംഗ് ലോകത്ത് ശ്രദ്ധപിടിച്ചു പറ്റിയത്. കറുപ്പ് മനോഹരമാണ്, കറുപ്പ് സ്വര്‍ണമാണ്, കറുപ്പ് നിർഭയമാണെന്ന തിരിച്ചറിവാണ് ഇവരൊക്കെയും ലോകത്തിന് പകർന്നു നൽകിയത്.
