രാം ചരണും ബോളിവുഡ് നായിക ജാൻവി കപൂറും ആദ്യമായി ഒരുമിക്കുന്ന സിനിമയുടെ ചിത്രീകരണം ആരംഭിച്ചു. ആർസി 16 എന്ന് താൽക്കാലികമായി പേര് നൽകിയിരിക്കുന്ന ചിത്രത്തിന്റെ പൂജ ഇന്നലെ ഹൈദരാബാദിൽ നടന്നു. തെലുങ്ക് സൂപ്പർസ്റ്റാർ ചിരഞ്ജീവിയാണ് ആദ്യ ക്ലാപ്പ് നൽകിയത്. നവാഗതനായ ബുച്ചി ബാബു സനയാണ് ചിത്രം സംവിധാനം ചെയ്യുന്നത്.
പൂജാ ചടങ്ങിൽ ചിരഞ്ജീവിയെ കൂടാതെ സംഗീത സംവിധായകൻ എആർ റഹ്മാൻ, ബോളിവുഡ് താരം ബോണി കപൂർ എന്നിവരും പങ്കെടുത്തു. കൂടാതെ രാം ചരണിന്റെ ഭാര്യ ഉപാസന കാമിനേനി കൊനിഡേലയും ചടങ്ങിന്റെ ഭാഗമായി. ഇതിനിടെ ചിത്രീകരണത്തിനിടയിലുള്ള രാം ചരണിന്റെയും ജാൻവിയുടെയും ചിത്രവും പുറത്തുവന്നിട്ടുണ്ട്.
ജാൻവി കപൂറിന്റെ ജന്മദിനത്തിലായിരുന്നു ചിത്രത്തിന്റെ പ്രഖ്യാപനം നടന്നത്. മൈത്രി മൂവി മേക്കേഴ്സ് പ്രൊഡക്ഷൻ ഹൗസാണ് ചിത്രം നിർമ്മിക്കുന്നത്.
