മലയാളികളാണ് ഏറ്റവും കൂടുതൽ മീൻ കഴിക്കുന്നതെന്ന് പൊതുവേ പറയാറുണ്ട്. ഇത് ശരിവെച്ച് ദേശീയ തലത്തിൽ നടത്തിയ പഠനം. ദിവസവും മത്സ്യം കഴിക്കുന്നവരുടെ എണ്ണത്തിൽ ഒന്നാം സ്ഥാനത്താണ് കേരളം. വേൾഡ് ഫിഷ്, ഇന്റർനാഷണൽ ഫുഡ് പോളിസി റിസർച്ച് ഇൻസ്റ്റിറ്റ്യൂട്ടും ഇന്ത്യൻ കൗൺസിൽ ഫോർ അഗ്രികൾച്ചറൽ റിസർച്ചും സംയുക്തമായാണ് പഠനം നടത്തിയത്.
കേരളത്തിൽ ആകെ ജനസംഖ്യയുടെ 53.5 ശതമാനം ആളുകളും ദിവസവും മത്സ്യം കഴിക്കുന്നതായി പഠനത്തിൽ വ്യക്തമായി. ഗോവ 36.2 ശതമാനം, പശ്ചിമ ബംഗാൾ 21.90 ശതമാനം, മണിപ്പൂർ 19.70 ശതമാനം, അസം 13.10 ശതമാനം, ത്രിപുര 11.50 ശതമാനം എന്നിവരാണ്് പട്ടികയിലുള്ള മറ്റ് സംസ്ഥാനങ്ങൾ.
എന്നാൽ ജനസംഖ്യ കണക്കിലെടുക്കുമ്പോൾ ഏറ്റവും കൂടുതൽ മത്സ്യം കഴിക്കുന്നവരുള്ളത് ത്രിപുരയിലാണ്. ഇവിടെ 99.35 ശതമാനം ജനങ്ങളും മത്സ്യം കഴിക്കുന്നവരാണ്. ഈ മാനദണ്ഡം അടിസ്ഥാനമാക്കിയാൽ കേരളം എട്ടാം സ്ഥാനത്താണ്. ഇവിടെ 97.35 ശതമാനം പേരാണ് മത്സ്യം ഇഷ്ടപ്പെടുന്നത്. മണിപ്പൂർ (99.25%), അസം (99.10%), അരുണാചൽ പ്രദേശ് (99.05%), നാഗാലാൻഡ് (98.85%), പശ്ചിമ ബംഗാൾ (98.60%), മേഘാലയ (98.50%) എന്നിവയാണ് മീനിനോട് ഇഷ്ടമുള്ള മറ്റ് സംസ്ഥാനങ്ങൾ.
രാജ്യത്ത് പുരുഷന്മാരുടെ ജനസംഖ്യയുടെ 78.6 ശതമാനവും വനിതകളിൽ 65.6 ശതമാനം പേരും മീൻ ഉപയോഗിക്കുന്നവരാണെന്നും പഠനത്തിൽ കണ്ടെത്തി. 2005 മുതൽ 2021 വരെയുള്ള മത്സ്യ ഉപഭോഗം അടിസ്ഥാനമാക്കിയാണ് റിപ്പോർട്ട് തയ്യാറക്കിയത്.
