സംവിധായകൻ ലോകേഷ് കനകരാജും നടി ശ്രുതി ഹാസനും പ്രധാനവേഷത്തിലെത്തുന്ന ‘ഇനിമേൽ’ എന്ന മ്യൂസിക് വീഡിയോയുടെ ടീസർ കഴിഞ്ഞ ദിവസമാണ് പുറത്തുവന്നത്. സംവിധായകനിൽ നിന്നും നായകനിലേക്കുള്ള ലോകേഷിന്റെ ചുവടുമാറ്റം വളരെ ആകാംഷയോടെയാണ് പ്രേക്ഷകർ നോക്കി കാണുന്നത്.
ടീസർ പുറത്തു വന്നതിന് പിന്നാലെ കമന്റുമായി എത്തിയിരിക്കുകയാണ് നടി ഗായത്രി ശങ്കർ. ‘നിങ്ങളുടെ പടത്തിൽ ഞാൻ പ്രണയിച്ചപ്പോൾ എന്റെ തലവെട്ടി, എന്താണിത് ലോകേഷ്’ എന്നാണ് ഗായത്രി ശങ്കറിന്റെ രസകരമായ ചോദ്യം.
ലോകേഷ് കനകരാജ് സംവിധാനം ചെയ്ത കമൽഹാസൻ ചിത്രം വിക്രം എന്ന സിനിമയിലായിരുന്നു ഗായത്രി അഭിനയിച്ചത്. ചിത്രത്തിൽ, ഫഹദ് ഫാസിൽ അവതരിപ്പിച്ച അമർ എന്ന കഥാപാത്രത്തിന്റെ കാമുകിയായാണ് ഗായത്രി ശങ്കർ എത്തിയത്. എന്നാൽ, ഗായത്രിയുടെ കഥാപാത്രം ചിത്രത്തിൽ കൊല്ലപ്പെടുന്നുണ്ട്. അതുമായി ബന്ധപ്പെടുത്തിയാണ് ഗായത്രി കമന്റ് പങ്കുവച്ചിരിക്കുന്നത്.
കമൽ ഹാസനാണ് ദ്വാരകേഷ് പ്രഭാകർ സംവിധാനം ചെയ്ത ഇനിമേൽ എന്ന മ്യൂസിക് വീഡിയോയുടെ ഗാന രചന നിർവഹിച്ചിരിക്കുന്നത്. മാർച്ച് 25 നാണ് മ്യൂസിക് വീഡിയോ റിലീസ് ചെയ്യുന്നത്.
