മലപ്പുറം: മുഖ്യമന്ത്രിക്കെതിരെ മലപ്പുറം ജില്ലാ പൊലീസ് മേധാവിക്ക് പരാതി നൽകി ബിജെപി സംസ്ഥാന നിർവാഹ സമിതി അംഗം കെ.കെ സുരേന്ദ്രൻ. മലപ്പുറത്ത് കലാപമുണ്ടാക്കാൻ ലക്ഷ്യമിട്ട് മുഖ്യമന്ത്രി വിഷലിപ്തമായ നുണകൾ പറഞ്ഞുവെന്ന് കാണിച്ചാണ് പരാതി. സിപിഎം സംഘടിപ്പിച്ച സിഎഎ വിരുദ്ധ റാലിയിലാണ് മുഖ്യമന്ത്രി വിദ്വേഷപരാമർശം നടത്തിയത്.
മുഖ്യമന്ത്രിയുടേത് വർഗ്ഗീയ വിഷം ചീറ്റുന്ന പരാമർശമാണെന്ന് കെകെ സുരേന്ദ്രൻ ആരോപിച്ചു. മുഖ്യമന്ത്രിയും സിപിഎമ്മും എസ്ഡിപിഐയും പോപ്പുലർ ഫ്രണ്ടും തമ്മിൽ രഹസ്യ ധാരണയിൽ ഏർപ്പെട്ടിരിക്കുന്നു. ആ രഹസ്യ ധാരണയുടെ ഭാഗമായാണ് പോപ്പുലർ ഫ്രണ്ടുകാർ പോലും പറയാൻ മടിക്കുന്ന കാര്യങ്ങൾ ഇന്നലെ മുഖ്യമന്ത്രി മലപ്പുറത്ത് വച്ച് പൊതുവേദിയിൽ സംസാരിച്ചത്. മുഖ്യമന്ത്രി സംസ്ഥാനത്ത് സാമുദായിക കലാപമാണ് ഉണ്ടാക്കാൻ ശ്രമിക്കുന്നതെന്നും കെകെ സുരേന്ദ്രൻ പറഞ്ഞു.
സംഭവത്തിൽ കേന്ദ്ര തിരഞ്ഞെടുപ്പ് കമ്മീഷനും മലപ്പുറം ജില്ലാ പോലീസ് മേധാവിക്കും സംസ്ഥാന തിരഞ്ഞെടുപ്പ് കമ്മീഷനും കെകെ സുരേന്ദ്രൻ പരാതി നൽകിയിട്ടുണ്ട്. മുസ്ലിം വിശ്വാസികൾക്കിടയിൽ റമദാൻ മാസത്തിൽ ഭയവും വെറുപ്പും വളർത്തുക എന്ന ഉദ്ദേശ്യത്തോടെയാണ് മുഖ്യമന്ത്രിയുടെ പ്രസംഗമെന്നും കെകെ സുരേന്ദ്രൻ ആരോപിക്കുന്നു.
